Гаврил Хоро нэһилиэгэр 1984 с. төрөөбүтэ.

         Ганя убайа Платон кэнниттэн сотору буолаат Үөһээ Бүлүүтээҕи оҕо спортивнай оскуолатыгар үөрэнэ киирэр уонна эмиэ Платон курдук Олимпийскай эрэл училищетыгар үөрэнэр уонна эрчиллэр. Онно үөрэнэ сылдьан көҥүл тустууга РФ маастарыгар кандидат буолар, хапсаҕайга тустан Халдеев, Ли-Фу турнирдарын кыайар, Намынан, Чурапчынан, Амманан сылдьан хапсаҕайдаһан СР спордун маастарын нуорматын толорор.

         Гаврил дойдутугар кэлээт, тута тустан барар, Буучугурас, Бычырдаан бириистэрин кыайар, өссө Бычырдаан бирииһин муҥутуур кыайыылааҕа буолар. Гаврил хайа да бөҕөстүүн тэҥҥэ тустар кыахтаах, үчүгэй сүһүөхтээх, илиитигэр күүстээх, хапсаҕай албастарын баһылаабыт бөҕөс. Ол курдук, СР 2015 с. абсолютнай чемпионун Валерий Ивановы кыайан Бычырдаан бирииһин муҥутуур кыайыылааҕа буолбута,  бэрт үгүс республиканскай турнирдарга чемпионнаабыта, призердаабыта.