Саввинов Семен Степанович Маҥаас нэһилиэгиттэн төрүттээх киһи этэ. Төрүттэригэр үлэни-хамнаһы кыайар дьонноох аймах. Аҕата Хаптас Ыстапаана эбит. Ыстапаан ырааҕынан тэлэһийэн тустубатах эрээри, үлэтинэн-хамнаһынан мээнэ киһи тэҥнэспэт киһитэ үһү. Илиинэн от охсуутугар, от кыдаматыгар туруу үлэһит, күүстээх-күдэхтээх киһи эбитэ үһү, чугас эргин тустан кими да тулуппата үһү. Кини уола Сэмэн Маҥаастан Тамалакааҥҥа кэлэр, ыал буолар, 7 оҕону төрөтөн киһи оҥортуур.

         Семен эдэр эрдэҕиттэн ыһыахтарга тустара уонна оройуоҥҥа сыыйа биллэн барар. Оройуон иһигэр биллэр бөҕөстөрү Максим Халлановы, Семен Таныковы охтортоон улууска бастыҥ бөҕөс буолар. Ол кэмҥэ Манчаары Спартакиадата Саха сирин тыатын сирин спортсменнарыгар анаан тэриллэр, ити 1968 с. этэ. Оройуон чиэһин көмүскүү Семен Степанович 60 кг ыйааһыннаахтарга туста барар, ол кэмҥэ 50-ча саастааҕа.  Утарсааччыларынааҕар лаппа аҕа саастааҕа көстөр этэ. Ону Семен соччо улахаҥҥа уурбат быһыылааҕа, II м ылбыта. Кини иннигэр Анаабыр ааттааҕа, САССР элбэх төгүллээх чемпиона Николай Винокуров эрэ түспүтэ. Семен аа-дьуо тустара. Саастаах киһи буолан буолуо, мээнэ түһүөлээбэт этэ, сыыһа-халты туттубат быһыылааҕа, үчүгэйдик атахтыыра уонна илиитин күүһүнэн хотторбот этэ. Онон холкутук сылдьан охтортуура, арай Винокуровка тулуспатаҕа. Тамалакааннартан Егор Прокопьев, Серафим Саввинов тустубуттара, Егор Гольдеров (Уһун Дьөгүөр) мас тардыспыта, бары да бэрткэ кыттыбыттара. Егор, Серафим чемпион буолбуттара,  Семен II м буолар, уола Семен V м ылар, Дьөгүөр Гольдеров II м ылар. Биир кыра сиртэн бэртээхэй кыайыы. Оччолорго Тамалакаан Ороһу нэһилиэгэр киирсэрэ, кэлин туһунан нэһилиэк буолбута. Онтон эһиилигэр 1967 с. Семен Манчаары Спартакиадатыгар III м ылар, 1969 с. Спартакиадаҕа эмиэ миэстэлэһэр. Ити сыл Семен Степанович САССР хапсаҕайга маастара буолар. Ол кэмҥэ САССР чемпионатыгар эбэтэр Манчаары Спартакиадатыгар иккитэ бастаатаххына эбэтэр үс төгүл миэстэҕэ киирдэххинэ маастар аатын иҥэрэллэрэ. Тустуу ол кэмҥэ олох аҕыйах этэ. Улууска Буучугурас бирииһэ, Бүлүү зонатын хапсаҕайа буолара, баларга Семен тустара, бастыыра, миэстэлэһэрэ.

         Семен икки уола Сеня, Миша тусталлара. Семен Ньурбаҕа ыал буолан барбыта, онно эмиэ үчүгэйдик тустара иһиллэрэ. Саввиновтар үлэни-хамнаһы үлэлиир дьон этилэр, булду да бултууллара. Аҕалара олох хойукка дылы түүлээхтиирэ, биир сыл дойдутугар Маҥааска тахсан түүлээхтээн киирбитэ, олох ыраах Түҥ өрүс түбэтигэр сылдьыбыта. Сааһа ырааппыт да буоллар муус бөҕөнү алларан бултаабыта. 1973-1974 сс. Ороһуга тустуу буолбута, онно спорт маастара Серафим Саввиновтыын бэрт өр эрийсэн тустан тэҥнэспиттэрэ. Онон Семен Степанович Саввинов өр кэмҥэ, лаппа сааһырыар дылы тустубут бөҕөс, бу кини күүстээҕин, сүһүөхтээҕин көрдөрөр.