Серафим Пудович 1932 с. атырдьах ыйын 20 к. Ороһу нэһилиэгэр төрөөбүтэ. Оскуоланы бүтэрэн баран Байыаннай Морской Флокка 4 сыл сулууспалаабыта.

Сулууспатын кэнниттэн Якутскайдааҕы культпросветучилище библиотечнай отделениетын туйгуннук үөрэнэн бүтэрбитэ. Манна үөрэнэ сылдьан кэтэхтэн Саха государственнай университетын нуучча тылын салаатын  үөрэнэн бүтэрбитэ. Бу оччотооҕута олох сэдэх түбэлтэ этэ.

Кини өссө 1965 с. Иркутскайдааҕы государственнай университет журналистика отделениетыгар кэтэхтэн үөрэнэн 1971 с. бүтэрбитэ.

Серафим Пудович Сунтаар оройуонун «Ильич уота» хаһыакка үлэлээбитэ. Онно «Ньургуһун» литературнай түмсүүнү тэрийбитэ. «Ньургуһунтан» силис тардан үүммүт талааннар элбэхтэр, суруйааччы, поэт да буолбуттар бааллар.

Серафим Пудович кэлин 1975 с. Анаабырдааҕы «Кыһыл сулус» хаһыакка редактордаабыта, ССКП Анаабырдааҕы райкомун чилиэнэ этэ. 1981 с. үлэлии олорон ыалдьан өлбүтэ.

Үлэ дьонун туһунан элбэх очеркалары, ыстатыйалары суруйара, түөрт кинигэ бэчээттэппитэ, 1971 с. ССРС журналистарын Союһун чилиэнинэн ылыллыбыта.

Спорт сайдыытыгар эдэр ыччаты пропагандалааһыҥҥа үтүөтүн үрдүктүк сыаналаан: “Отличник физической культуры”, “Почетный член ДСО” знактарынан наҕараадаламмыта, хапсаҕай тустууга спорт маастара, нуучча дуобатыгар, хайыһарга  2-с разрядтаах дэгиттэр спортсмен этэ.