Бу сүрдээх интэриэһинэй аатынан саха норуотун аатырбыт бөҕөстөрүттэн Ньурба бөҕөһүн, ССРС спордун көҥүл тустууга маастарын Сергей Иванову уонна Мэҥэ ааттааҕын, Саха сирин көҥүл тустууга 7 төгүллээх, хапсаҕай тустууга элбэх төгүллээх чемпионун, 1985 с. ССРС чемпионатын II призерун Роман Цыпандины “көтөҕөр кыраан” диэн таптаан ааттыыллара. Син ол курдук Сергей Ли-Фуну үгүс утарсааччыларын икки атахтарыттан ылаат өрө баһан ылан охтортуурун иһин “көтөҕөр кыраан” диэн ааттаабыттара.

         Сергей Иванович Өргүөт нэһилиэгэр 1927 с. төрөөбүтэ. Ли-Фу Саха АССР спордун маҥнайгы маастардарыттан биирдэстэрэ. Саха АССР үс төгүллээх чемпиона, 1956 с. буолбут Саха АССР норуоттарын Спартакиадатыгар 65 кг ыйааһыннаахтарга чемпион буолбута. Сергей Иванович күннээн тустар кэмигэр тустуу ыйааһына суох буолар эбит, онтон атын өссө элбэхтэ бастыа хааллаҕа. Сергей Ли-Фу тустар кэмигэр ыйааһына 65-70 кг эбитэ үһү. Кини 1954 с. Илья Кондратьев кэнниттэн ыйааһына суох тустууга II м ылбыт. Бүлүүтээҕи педучилищены 1946 с. үөрэнэн бүтэрэн баран 45 сыл устата оҕону иитиигэ уонна тренеринэн үлэлээбит. 1968 сылтан 30 сыл устата Нам улууһугар физкультура учууталынан, тренеринэн үлэлиир. Кини биир бастыҥ үөрэнээччитэ Россия спордун үтүөлээх маастара П. Юмшанов.

         Сергей Иванович сааһыран да баран бэркэ тустара, ол курдук, 1968-1969 сс. I-кы, II-с Манчаары Спартакиадаларыгар 70 кг ыйааһыннаахтарга бириистээх миэстэлэри ылаттаабыта. Сергей Ли-Фу велосипедынан тэбиигэ Саха АССР чемпионаттарыгар бириистээх миэстэни ылаттыыра, хайыһары да үчүгэйдик тэбэрэ. Үөһээ Бүлүү оройуонун бастыҥ хайыһардьыта этэ, күрэхтэһиилэргэ мэлдьи бастыыра. Хапсаҕай, көҥүл тустууларга республиканскай категориялаах судьуйа.

         Сергей Иванович үрдүк культуралаах, ыраас, чэбэр өйдөөх-санаалаах киһи этэ, куруук ыраастык, маанытык таҥнара, киһини бэйэтигэр тардар күүстээҕэ. Сергей Ли-Фу оҕолоро бары олохторун булбут, үрдүк үөрэхтээх, республикаҕа биллэр-көстөр үлэһит дьон. Сергей Иванович ССРС физическэй культураҕа уонна спортка туйгуна, Россия үөрэҕириитин, Саха АССР үөрэҕириитин туйгуна, Бүтүн Союзтааҕы “Урожай” общество бочуоттаах чилиэнэ. Иккис дойду оҥостубут Намын улууһа уонна оҕолоро 1998 с. саҕалаан аҕаларын бирииһигэр хапсаҕай тустуу маастара нуормалаах турниры үрдүк таһымнаахтык тэрийэн ыыталлар.