Степан Александрович 1934 с. Үөһээ Бүлүү улууһугар төрөөбүтэ. Сэрии кэмигэр тулаайах хаалан оҕо дьиэтигэр иитиллибитэ. Саха АССР спордун маастара. Хомойуох иһин, кини үгүс өрүттээх, үксүгэр саҥаны киллэриилээх сыралаах үлэтэ сөптөөхтүк сыаналамматаҕа.

         Степан Сон 1952-1956 сс. Дьокуускайдааҕы педагогическай училищеҕа үөрэнэ киирбитэ. Дэгиттэр сайдыылаах уол спортивнай туризмҥа уонна гимнастикаҕа, чэпчэки атлетикаҕа, хайыһарга, көҥүл тустууга, гиирэҕэ уонна ытыыга, остуол тенниһигэр, волейболга уонна баскетболга I-II разрядтаах спортсмен буолбута. Үөрэҕин ситиһиилээхтик бүтэрэн, дойдутугар Далырга уонна Сунтаар орто оскуолаларыгар учууталлаабыта.

         1959 с. Элгээйигэ физкультура учууталынан таһаарыылаахтык үлэлээбитэ. Мааны майгылаах-сигилилээх, дьоҥҥо барытыгар аламаҕай, эйэҕэс, көрдөөх-көрүдьүөстээх эдэр киһини нэһилиэнньэ сөбүлээбитэ. Бэйэтэ сүүрэн-көтөн араас гимнастическай, атын да спортивнай снарядтары булан, спорт араас көрүҥнэригэр секциялары ыыппыта, оскуола оҕолорун түмэ тардыбыта. Бэйэтэ оройуон күрэхтэһиилэригэр урут дьарыктаммыт көрүҥнэрин таһынан, үстэ төхтүрүйэн ыстаныыга, үҥүүнү уонна ядрону быраҕыыга хастыы да төгүл чемпионнаан турар. Сунтаар оройуонугар оччолорго саҥа үөдүйэн эрэр көҥүл тустууну, остуол тенниһин уонна туризмы оскуола оҕолорун дьарыктарыгар, уруоктарга киллэрбитэ.

         1963 с. Элгээйи эдэр туристара кини салалтатынан оройуонтан аан бастакынан республика күрэхтэһиитигэр кыттыбыттара уонна бочуоттаах 4-с миэстэни ылбыттар.

         1959 с. кини бэлэмнээбит оройуон сүүмэрдэммит хамаандата үөрэнээччилэр ортолоругар национальнай көрүҥнэргэ II-с м буолбуттара. Ордук үчүгэйдик бу куоталаһыыга Борис Антонов, Геннадий Дмитриев кыттыбыттара.     

         Степан Сон хапсаҕайга олус үчүгэйдик тустара, оройуонугар, Бүлүү зонатыгар мэлдьи бастыыра, бириистээх миэстэлэргэ тиксэрэ. Кэлин хапсаҕай тустуу күрэхтэһиитэ элбээн республикаҕа ыытыллар турнирдарга, чемпионаттарга бастыыр, миэстэлэһэр буолбута, ити ситиһиилэринэн хапсаҕайга Саха АССР спордун маастарын аатын ылбыта.

         Степан Александрович үлэлээбит сиригэр Элгээйигэ ыал буолан олорбута, үлэтинэн-хамнаһынан, мааны майгытынан олохтоохторго олус сөбүлэппитэ. Билигин Степан Александрович олоҕун оҕолоро салгыыллар.