Евсей Николаевич ийэтинэн төрүт Боотулуу буолар. Ийэтэ Настаа боотулуулар биир былыргы төрүттэриттэн Хаппартан силис-сыдьаан тардар. Евсей Николаевич ийэтинэн эһэтэ Уус Ньукулай. Баҕадьа эбэ баһыгар Чөккөөкүгэ олорбут Силиппиэннээх Ылдьаана уоллара. Бу аҕа ууһа Саха сирин хапсаҕайын историятыгар бэйэлэрин дьоһун суолларын-иистэрин хаалларбыт биллиилээх маастардары ини-бии Софроновтары уонна Уйгуровтары биэрбитэ. Хапсаҕай биллиилээх маастардара ини-бии Евсей уонна Роман Софроновтар Үөһээ Бүлүү улууһун спортивнай чиэһин элбэх сыллар усталарыгар ситиһиилээхтик көмүскээбиттэрэ. Евсей Николаевич Чурапчы спортивнай оскуолатын бүтэрбитэ, уһулуччулаах тренер Д.П. Коркиҥҥа эрчиллэн-иитиллэн, такайыллан кэлбитэ. СР хапсаҕайдаһан тустууга спордун маастара, ССРС көҥүл тустууга спордун маастарыгар кандидат, I разрядтаах дуобатчыт, оройуон элбэх төгүллээх чемпиона, призера.

Евсей Николаевич республика Ис Дьыалатын министерствотын ветерана, милиция подполковнига, уһун сылларга Үөһээ Бүлүү ГАИ-тын начальнигынан үтүө суобастаахтык үлэлээбитэ. Үөһээ Бүлүү улууһун бочуоттаах олохтооҕо. Мантан аллара кини спортивнай олоҕор ситиспит сүрүн ситиһиилэрин кылгастык киллэрэбит:

1979 с. көҥүл тустууга “Динамо” общество чемпиона.

1980 с., 1986 с. оройуон 10 бастыҥ спортсменнарын ахсааныгар киирбитэ.

1980 с. Ульяновскайга РСФСР ИДьМ бирииһигэр II-с призера, хапсаҕайга Бүлүү зонатын абсолютнай чемпиона.

1986 с. дуобакка Үөһээ Бүлүү оройуонун 2-с лигаҕа II-с призера.

1986 с. Саха АССР норуоттарын Х Спартакиадатын хапсаҕайга абсолютнай чемпионатын II-с призера, көҥүл тустууга зона күрэхтэһиитин призера, Үөһээ Бүлүү оройуонун 1986 с. ыһыаҕын абсолютнай чемпиона.

1987 с., 1992 с. Бычырдаан бирииһин чемпиона.