Роман Софронов 1964 с. бэс ыйын 14 к. Николай Семенович, Анастасия Николаевна дьиэ кэргэнигэр Нам Балаҕаннааҕар төрөөбүтэ. Бу дьиэ кэргэн 5 уол оҕолоох, олортон 4 уол көҥүл, хапсаҕай тустуунан дьарыктаммыттара, бары көҥүл тустууга спорт маастарыгар кандидаттар. Ол курдук, улахан уол Аркадий 1974 с. Дьокуускай куоракка Бүтүн Союзтааҕы турниры кыайан ССРС спордун маастарын нуорматын толорбута. Атын уолаттар Коля, Евсей, Роман бары маастарга кандидаттар. Бу уолаттартан Евсей уонна Роман Саха сирин хапсаҕайга маастардара. Ол эрэн, бырааттыылартан ордук элбэхтик Евсей тустубута. Роман эдэригэр Д.П. Коркиҥҥа эрчиллибитэ. Онон Софроновтар спортивнай дьиэ кэргэн диэн инньэ Сэбиэскэй саҕаттан ааттаналлара, ол билигин да салҕанар, сиэннэр, хос сиэннэр бары боксердар.

         Роман элбэхтик күрэхтэспэт этэ. Үлэтэ-хамнаһа да оннук этэ. Дьокуускай куоракка урут Физкультурниктар күннэригэр маастар нуормалаах хапсаҕайга абсолютнай чемпионат ыытыллара, оннук биир куоталаһыыга 21 бөҕөс тустубут. Бу тустууга Роман Софронов соргулаахтык тустан абсолютнай чемпион аатын ылбыта уонна СР спордун маастара буолбута. Ол эрэн биир тустуунан маастар буолбута диэн өйдөбүл сыыһа, бу улахан турнирга кыайарга элбэх сыллаах эрчиллии, күүс-уох, ону таһынан хапсаҕай албастарын баһылаабыт эрэ бөҕөстөр чемпион буолаллар. Холобур, саха норуотун аатырбыт хапсаҕайдьыта П.Е. Алексеев бу турнирга кыайбыта уонна САССР спордун маастара буолбута, ССРС спордун маастара, САССР абсолютнай чемпиона Сергей Алексеев курдук дьон бу күрэхтэһиини кыайаллар. Онон бу тустуу күүстээх күрэхтэһии. Роман куораттан кэллэҕинэ Үөһээ Бүлүүгэ хапсаҕай күрэхтэһиилэригэр кыттааччы, үчүгэй тустуулары көрдөрөөччү. Кини хапсаҕайга хас да республиканскай турнирдарга, Бүлүү зонатын күрэхтэһиилэригэр чемпионнаабыта уонна призердаабыта.