Кырыкыйтан төрүттээх Степан Степанов уонна Далыр олохтооҕо Зинаида Герасимова дьиэ кэргэннэригэр саамай кыра оҕоннон Володя Степанов 1983 с. төрөөбүтэ. Уол олох кыра эрдэҕиттэн бэйэтин кыанар, сүүрэр-көтөр тэбэнэттээх, сытыы-хотуу оҕо этэ, ол иһин да буолуо, кинини Далырга тэриллибит Циркэ студиятыгар  ылбыттара. Уол онно оруобуна сөп түбэспитэ, иитээччи Е.Е. Софронова этиитин лоп-бааччы толороро уонна бу көрүҥү идэ оҥостон үлэлииргэ-хамсыырга сорук оҥостон, Москва куоракка үөрэнэн циркач идэтин ылбыта уонна ол идэтинэн билигин Дьокуускай куорат циркатыгар айымньылаахтык үлэлии сылдьар. Вова төһө да циркэ артыыһа буолбутун, күнү быһа нүөмэрдэрин чочуйан сэттэ көлөһүнүн тохтор, аата-ахсаана биллибэт концертарга кытыннар оҕо эрдэҕиттэн сөбүлээн дьарыктаммыт хапсаҕайын олох умнубат, быыс буллар эрэ эрчиллэ түһээт турнирдарга, чемпионаттарга уонна Федерация Кубогын күрэхтэһиитигэр төрөөбүт Үөһээ-Бүлүүтүн аатыттан өрүү бэйэтин кыаҕынан тустар. Владимир Степанов киин улуустарга ыытыллар республиканскай турнирдарга ситиһиилээхтик тустара, ону таһынан Үөһээ- Бүлүүгэ ыытыллар Буучугурас, Бычырдаан бириистэригэр кыттара, сылтан-сыл аайы тустар маастарыстыбата үрдээн иһэрэ дьон хараҕар биллэн-көстөн барбыта. Циркэ үлэһитэ буолан илиитигэр күүстээх, сүһүөхтээх, онон тустар албастара да онно майгынныыра, атахха киирэн көтөҕөн таһаартыыр, илиитинэн киирсэн тутуһан-хабыһан тустар, умса тардар, «түргэнниир», атаҕынан олуйан тиэрэ көтөр, ол сылдьан үлүһүйэн, утарсааччытыгар киирэн биэрэн сорох түгэннэргэ охтуталыыр. Ол курдук, кини саамай табыллан Хороҕо буолбут республика чемпионатыгар 55 кг ыйааһыннаахтарга кими да тулуппатаҕа, үксүлэрин атахтарыттан ылан көтөҕөн таһааран охтортообута уонна 2013 с. Саха Республикатын чемпиона буолбута. Сорох дьыл Саха Республикатын чемпионатыгар кыттыбат, командировкаҕа буолар, ол эрэн Федерация кубогар ыҥырыы туттаҕына хайаан да кыттар. Ол курдук 2013 с., 2014 с. улуус хапсаҕайдьыттара кубок хаһаайыннара буолбуттарыгар Володя хамаанда биир эрэллээх бөҕөһө этэ. 2015 с. республика чемпионатыгар Үөһээ-Бүлүү Хоротугар 55 кг эмиэ балайда үчүгэйдик  тустубута. Хас да интэриэһинэй, халбархай сытыы тустуулары көрдөрбүтэ. 2016 с. Якутскай куоракка буолбут чемпионакка 62 кг ыйааһыннаахтарга тустубута. 69 бөҕөс кыттыбыт ыйааһыныгар 4 миэстэни ылбыта. Бу тустууга Владимир Степанов бырааттара, аҕата Степан бииргэ төрөөбүт быраата Павел Степанов уолаттара, Стас хапсаҕай маастара, республика биир күүстээх бөҕөһө, Аан дойду кумахха тустууга чемпиона, иккис уол Сахамин Саха Республикатын спордун маастара, үһүс уол Степан Саха сирин биир күүстээх бөҕөһө кыттыбыттара. Аҕалара эдэригэр Чурапчы тустууга оскуолатыгар үөрэммитэ, эһэлэрэ Степан улууска биллэр тустуук этэ. Онон бырааттыы Степановтар удьуор тустууктар.