Бу СР хапсаҕайга спордун маастара Сахамин Степанов Кырыкый нэһилиэгэр 1993 с. тохсунньу ый 24 к. Павел, Татьяна Степановтар дьиэ кэргэннэригэр иккис оҕонон күн сирин көрбүтэ. Кини иннигэр Стас төрөөбүтэ, кини СР спордун маастара, кумахха тустууга Аан дойду чемпиона. Онтон үһүс оҕонон Степа төрөөбүтэ, кини Саха сирин 55-62 кг биир күүстээх бөҕөһө. Онон Павел, Татьяна Степановтар дьиэ кэргэннэрэ — спортивнай дьиэ кэргэн. Уолаттар эһэлэрэ Степан Павлович Егоров улууска биллэр спортсмен этэ. Манчаары Спартакиадатыгар ветераннарга атах оонньуутугар куобахха III м ыла сылдьыбыт. Сахамин Кырыкыйга кыра кылаастарга үөрэнэр кэмигэр Михаил Егоровка тустууга эрчиллибитэ, онтон оҕо спортивнай оскуолатыгар дьарыктаммыта. Оҕо сылдьан көҥүл тустууга эмиэ тустара. Оскуола кэнниттэн университет физкультурнай отделениетыгар үөрэнэ киирэр, 1-кы курсу бүтэрбитин кэннэ армияҕа сулууспаҕа ыҥыраллар. Сахамин олох оҕо сылдьан 17 саастааҕар Хороҕо буолбут СР чемпионатыгар 5-с м ылбыта. Бу тустууга кини кэскиллээҕэ биллибитэ, СР күүстээх бөҕөстөрүн охтортуур, ол иһигэр Уус-Алдан күүстээх бөҕөһө К. Бурнашеву охторор. Үөрэнэ сылдьан Н.К. Докторов-Бычырдаан бирииһигэр III м ылар. Университетка үөрэнэр кэмигэр Өймөкөөн улууһугар С. Оконешников бирииһигэр I  м ылар, 2013 с. Покровскайга Виктор Михайлов бирииһигэр эмиэ I  м ылар, 2015 с. Ис дьыала министерствотын (министр Кошелов) бирииһин улахан турнирыгар II м ылар, Мэҥэ-Хаҥаласка Мэҥэ аатырбыт бөҕөстөрө Михаил Тихонов, Роман Цыпандин бириистэригэр II м ылар. Ити түмүгүнэн Сахамин Степанов СР хапсаҕайга маастара буолар. Бу кэмҥэ Сахамин университет II курсугар ситиһиилээхтик үөрэнэ сылдьара. Сахамин оҕо эрдэҕиттэн үчүгэй техникалаах бөҕөс быһыытынан биллэрэ, атаҕын ис-тас өттүнэн үчүгэйдик тэбэр, атахха киирэн сүгэн, көтөҕөн тустар, “түргэннээһин” албаһы бэркэ оҥорор, атаҕынан эрийэн охторор уонна атахха эргийэн киирэр албастардаах бөҕөс.