Үөһээ-Бүлүү улууһун Кырыкый нэһилиэгэр 1991 с. тохсунньу 20 күнүгэр Павел, Татьяна Степановтарга бастакы оҕоннон төрөөбүтэ.

         Стас алта сааһыгар, оскуолаҕа киирэ да илигинэ Кырыкый оскуолатыгар  ыытыллыбыт тустууга аан маҥнай 1997 с. олус баҕаран туран тустубута, онно көрдөххө тустар баҕата улахан этэ эрээри, аҕа саастаах оҕолор хоппуттара. Онтон оскуолаҕа киирээт тустуу секциятыгар Михаил Егоровка дьарыктана кэлбитэ. Стас кэлин Үөһээ Бүлүүтээҕи спортивнай оскуолаҕа үчүгэйдик дьарыктанан оҕолор ортолоругар көҥүл тустууга Саха сирин чемпиона буолбута, ону таһынан Уһук Илин Федеральнай уокурук  чемпиона буолбута. Оскуолаҕа үөрэнэр кэмигэр хапсаҕайынан эмиэ дьарыктаммыта, улуус, республиканскай турнирдары кыайбыта.  Улуус хамаандатын састаабыгар киирэн 2007 с. Федерация кубогар 70 кг ыйааһыннардаахха утарсааччыларын барыларын хоппута, сүрдээх тыҥааһыннаах тустуу буолбута, онно эдэр бөҕөс Стас Степанов үчүгэй хапсаҕайы көрдөрбүтэ, дьон-сэргэ эдэр, үчүгэй хапсаҕайдьыт тахсан эрэр диэн бигэтик эрэммиттэрэ. Ити дьыл оҕолор ортолоругар улуус абсолютнай чемпиона буолбута, суол хаалыыта ыраах Кэбээйи улууһугар Валерий Мандаров бирииһигэр хапсаҕайга тустуу буолбута, онно баран кыттан Стас эмиэ кими да тулуппатаҕа, оҕолор ортолоругар Кэбээйи улууһугар эмиэ муҥутуур кыайыылаах буолбута, оччолорго сыаналаах үчүгэй бириистээх кэлэн дьоннорун үөрдүбүтэ. Ити курдук Стас оҕолорго үчүгэй түмүктээхтик тустан, сааһа ситэн аны улахан дьоннору кытта туста тахсыбыта, оскуолаҕа эрдэ киирбит буолан саастыылаахтарынааҕар биир сыл урутаан орто оскуоланы бүтэрбитэ. Өр күүттэрэ барбатаҕа, улахан дьоҥҥо университет, М.П. Малардыров бириистэрин кыайбыта. 2010 с. кулун  тутар ыйга П.Е. Алексеев бирииһин көбүөрэ Чурапчыга тэлгэммитэ, бу куоталаһыыга улуус хамаандата үчүгэйдик бэлэмнэнэн туста барбыта, Стас 70 кг ыйааһыннаахтарга Боотулуу бөҕөстөрө Рустам, Геннадий Прокопьевтары кытта улууһун чиэһин көмүскээбитэ уонна убайдарын иннигэр түһэн финалга тахсыбыта, кини иннигэр Саха Сирин күүстээх хапсаҕайдьыта Дьааҥы бөҕөһө Василий Стручков эрэ түспүтэ, уопута суоҕуттан Стручковка эрэ хотторбута. Ити кэнниттэн Стас үөрэххэ киирэр, ыал буолан оҕолонон тустуутун быраҕа  сылдьыбыта, икки сыл курдук күүскэ тустубатаҕа. Онтон кэргэнин дойдутугар ыраах Өлөөҥҥө барар, оҕолору тустууга дьарыктыыр, үлэҕэ киирэр. Онтон 2015 с. Өлөөнтөн оҕолору туһуннара уонна бэйэтэ туста Н.К. Докторов-Бычырдаан бирииһигэр кэлэр, Үөһээ-Бүлүү уолаттарын кытта дьарыктанан баран көбүөргэ тахсар уонна уруккутун курдук түргэн-тарҕан, сылбырҕа, албастардаах тустууну көрдөрөн 80 кг ыйааһыннаахтарга бастыыр, салгыы Ис дьыала министерствотын бирииһигэр кыттар уонна П.Е. Алексеев бирииһигэр кыттарга бэлэмнэнэр. Финалга Саха сирин чемпиона Роберт Сидоровка сабырыйтаран иккис төгүлүн Саха сиригэр II миэстэни ылар.

         Стас Степанов хапсаҕай тустуу Федерациятын быһаарыытынан бэс ыйыгар кумахха тустууга Аан дойду чемпионатыгар кытта, Россия чиэһин көмүскүү Румынияҕа тахсара быһаарыллар. Дьокуускай куоракка түмсүү кэнниттэн Румынияҕа көтөллөр, хамаанда састаабыгар Үөһээ-Бүлүүттэн Дима Донской (Харбалаах), Увар Тимофеев (Нам), Рустам Прокопьев (Боотулуу) буолан бараллар. Бу тустууга Дима Донской, Стас Степанов Аан дойду чемпионнара буолаллар.