Эһэтин аатын сүгэ сылдьар Семен Таныков Ороһуга Аким Семенович уонна Наталья Прокопьевна Таныковтарга 1981 с. атырдьах ыйын 25 к. төрөөбүтэ. Семену олох кыра эрдэҕиттэн тренер И.Г. Кысылбаиков дьарыктаабыта. Семен орто оскуоланы бүтэрэн, Бүлүү педучилищетыгар үөрэнэ киирбитэ. Манна хапсаҕайга дьарыктанан ситиһиилээхтик тустан барбыта. Бүлүүгэ 2001 с. В.Г. Румянцев бирииһигэр 55 кг I м ылбыта, 2002 с. бу куоталаһыыга II м, 2002 с. Ньурбаҕа В. Ефремов бирииһигэр I м, 2003 с. В.Г. Румянцев бирииһигэр III м, 2004 с. М. Малардыров бирииһигэр I м, 2004 с. Бычырдаан бирииһигэр II м, 2005 с. П.Е. Алексеев бирииһигэр республика чемпионатыгар II м ылаттаабыта. Семен Таныков маны таһынан Майа Манчаарытыгар хапсаҕайы сэргэ буолбут Бүтүн Россиятааҕы хапсаҕай Фестивалыгар ыйааһыныгар II м ылбыта. Онон төрүттэрин, күүстээх Таныы аҕатын ууһун салҕааччылартан биирдэстэрэ Семен Таныков буолар. 

         Семен Таныков хапсаҕай тустуу биир халбархай быраҕыылардаах бөҕөһүнэн биллэр, сүрдээх түргэн туттуулаах бөҕөс, бүдүрүйбэт сүһүөхтээх, кимэн киирэр стиллээх бөҕөс, ордук атахха үчүгэйдик киирэн көтөҕөр, тиэрэ көтөр албастардаах. Семен утарсааччытын илин, кэлин да атахтарыгар чыпчылыйыах түгэнигэр киирэр, онтон атаҕыттан ыллаҕына хайаан да охторон тэйэр. Тустуук бары ити албаһы эҥкилэ суох оҥорбот, кини оҕо эрдэҕиттэн үчүгэйдик ылсан дьарыктаммыт бөҕөс буолан, ити албаһа сатанар. Семен төрүттэрин хааннарыгар хапсаҕай тустуу баар буолан тахсыылаахтык тустубута.