Хапсаҕайга Саха АССР спордун маастара Василий Иванович Тартакынов 1961 сыл муус устар 18 күнүгэр Үөһээ Бүлүү оройуонун Нам нэһилиэгэр Өргүөттэн төрүттээх Иван Матвеевич Тартакынов уонна Нам төрүт олохтооҕо Мария Давыдовна Гаврильева дьиэ кэргэттэригэр төрөөбүтэ. Бииргэ төрөөбүттэр 11-дэр. Биир эдьиийин Машаны алта ыйдааҕар Өргүөккэ ыал буолан олорор аҕаларын эдьиийэ Мария Матвеевна Петрова, бэйэтэ оҕото суох буолан ииттэ ылан кэргэнин аннынан суруттарбыта, ол кыыс билигин Васильева Мария Трофимовна диэн. Вася бастакы кылааска үөрэнэ сырыттаҕына аҕалара, онтон төрдүскэ сырыттаҕына ийэлэрэ өлөннөр аны бииргэ төрөөбүттэр бары Өргүөттээҕи  эдьиийдэрин дьиэ кэргэнин көрүүтүгэр-харайыытыгар киирбиттэрэ. Улахаттар интернакка олорон салгыы Намҥа үөрэммиттэрэ. Кыралар Өргүөт оскуолатыгар киирбиттэрэ. Вася Тойоку аҕыс кылаастаах оскуолатыгар үөрэнэр кэмигэр доруобуйатын туругунан физкультура уруогуттан босхолонуулаах эбит. Ол да буоллар оскуола көрүдүөрүгэр турар теннис остуолларыгар оҕо барыта сөбүлээн оонньуурутан хаалсыбат. 1975 сыллаахха оскуола хамаандатыгар киирсэн физкультура учуутала Виталий Калинникович Захаров салалтатынан оройуон күрэхтэһиитигэр хамаанданан бастаабыттара.

1977 сыллаахха ахсыс кылааһы бүтэрэн салгыы Нам орто оскуолатыгар үөрэнэ киирбитэ уонна физкультура уруогар сылдьарын саҕалаабыта. Ону таһынан Валерий Николаевич Семеновка көҥүл тустуунан утумнаахтык дьарыктанан барбыта уонна оройуон икки төгүллээх чемпиона, Бүлүү зонатын чемпиона буолбута, 1978 сыллаахха республикаҕа көҥүл тустууга төрдүс миэстэни ылбыта. Ол сайыныгар Нам оройуонун киинигэр ыытыллыбыт республика үөрэнээччилэрин Спартакиадатыгар хапсаҕайга иккис миэстэни ылары ситиспитэ. Онус кылааска сылдьан Васялаах кылаастара Бүтүн Союзтааҕы “Орленок” байыаннай-патриотическай оонньуу оройуоннааҕы, онтон республикатааҕы түһүмэхтэригэр бастааннар Украинскай ССР Днепропетровскай куоратыгар Союз таһымыгар күрэхтэһэн кэлбиттэрэ. Ол сылдьан Вася онно үөрэнэ сылдьар биир дойдулаахтарын көрсөн билсэр.

Оскуола кэнниттэн тута Днепрорпетровскайдааҕы физкультурнай институтка үөрэнэ киирэр. Онно үөрэнэр кэмигэр көҥүл тустууга Днепрорпетровскай куорат, уобалас чемпиона, призера буолуталыыр. 1983 сыллаахха үөрэҕин бүтэрэн баран икки сыл Сэбиэскэй Аармыйа кэккэтигэр сулууспалаан кэлэр уонна төрөөбүт оройуонугар үлэлээн барар.

Хапсаҕайга 1985 сыллаахха оройуон ыһыаҕар бастыыр, буойун спортсменнар В.И. Степанов-Буучугурас (1986 с.), Н.К. Докторов-Бычырдаан (1989 с.) бириистэригэр турнирдар чемпионнара буолар.

Василий 1988 сыллаахха Дьокуускайга ыытыллыбыт Саха АССР хапсаҕайга чемпионатын үрүҥ көмүс призера, Покровскайга буолбут тыа сирин III спортивнай оонньууларын чемпиона буолан, оройуон бастыҥ спортсмена аакка тиксибитэ. 1989 сыллаахха Бүлүүгэ республика чемпионатыгар бастаан хапсаҕайга Саха АССР маастарын нуорматын толорбута. 

Ветераннарга тахсан баран республикатааҕы хапсаҕай Федерациятын Кубогар хамаанданан күрэхтэһии 2006,2007 уонна 2008 сыллардааҕы призера уонна чемпиона.

Василий Иванович Тартакынов Саха Республикатын үөрэҕириитин туйгуна, “Физическэй культураны уонна спорду сайыннарыыга үтүөлэрин иһин” түөскэ кэтиллэр бэлиэ хаһаайына, Российскай федерация спортка миниистирэ В. Мутко аатыттан Бочуотунай грамоталаах, педагогическэй үлэ ветерана.