Саха АССР спордун хапсаҕайга маастара Бүлүү улууһун Халбаакы нэһилиэгиттэн төрүттээх Егор Терентьев Тамалакаан нэһилиэгэр ыал буолан, оҕону эт-хаан өттүнэн иитии учууталынан уонтан тахса сыл үлэлээтэ. Кини тустуук быһыытынан дойдутугар олорон сураҕырбыта. Терентьевтэр элбэх бырааттыылар. Егор бииргэ төрөөбүт бырааттара Көстөкүүн уонна Иван СР хапсаҕайга маастардара. Егор 80 кг ыйааһыннаахтарга тустара, онтон модьураан ыарахан ыйааһыҥҥа тахсыбыта. 80 кг тустарын саҕана Бүлүүгэ ыытыллар В.Г. Румянцев бирииһэ күүстээх турнирынан биллэр этэ.  Республика хоту-соҕуруу өттүттэн күүстээх бөҕөстөр мусталлара. Бу улахан турнирга Егор 4 бастаабыта. Ол быыһыгар икки улууһунан сылдьан араас куоталаһыыларга кыттара уонна бириистээх миэстэттэн түспэтэҕэ. Буучугурас, Бычырдаан, Ли-Фу бириистэригэр миэстэлэһэн сотору спорт маастара буолбута. Егор тустарыгар үксүн хоннох аннынан киирэн көтөҕөн тустара, ол албаһа үксүгэр сатанан, СР күүстээх бөҕөстөрүн охтортуура. Хас да сыл кэтэһэн 2016 с. ветеран бөҕөстөргө кыттар сааһа туолбута, 2016 с. ветераннарга “Хаҥалас хапсаҕайыгар” туста сылдьан травма ылан тустуута эмиэ уһаата, быйыл тустуо дии саныыбыт.

         Егор Иванович төрөппүт уола Ньургун бу кэмҥэ оҕолорго 62 кг ыйааһыннаахтарга республика күүстээх бөҕөһө, улууска бастыҥ. Егор Иванович физрук быһыытынан нэһилиэгэ улууска бастыҥ аатырарыгар үгүс элбэх өҥөлөөх, тиһигин быспакка ыччаты кытта үлэлэһэр, бэйэтэ эмиэ кыттар.