Харлампий Терентьев эдэригэр соччо тустубатаҕа, ыһыахтарга эҥин биирдэ эмит тустара уонна куһаҕана суох тустара. 2000 сыллар ортолоругар Саха сиригэр уонна биһиэхэ хапсаҕай күрэхтэһиитэ бөҕө буола түспүтэ. Онно Буучугурас бирииһигэр Харлампий утарсааччыларын олох тулуталаабатаҕа, икки атахтарыгар киирэ-киирэ тиэрэ көтөттүүрэ, ол быыһыгар хоннохторун икки ардынан киирэн охтортоон бастаабыта. Ол тустуу кэнниттэн кэпсэтии буолбута: “Бу ый ортотугар “Хаҥалас хапсаҕайа”, ый бүтүүтэ С.И. Ли-Фу бирииһэ Намҥа буолар, баран туһун, иккиэннэригэр үс иһигэр киирдиҥ да СР маастарын нуорматын толороҕун” — диэн буолбута. Харлампий: “Баран тустуталыам, хайаһабын” — диэбитэ уонна Хаҥаласка I м, С.И. Ли-Фу бирииһигэр II м ылан 1 ый иһинэн спорт маастара буолбута. Бу эттэххэ дөбөҥ биир ый иһинэн диэн, дьиҥинэн тустуук оҕо эрдэҕиттэн эрчиллэн, бэлэмнэнэн, көлөһүнүн тоҕон маастар аатын ылар, ол сорохторго кыаллыбат, маастар буоларга эрдэттэн санааны ууран, эрчиллиэххэ, дьаныһыахха уонна айылҕа барахсан эйиэхэ биэрбитин сыыһа туттумуохха наада. Ити кэнниттэн Харлампий кулун тутар саҥатыгар Тамалакааҥҥа кэлэн Чөҥкөй бөҕө бирииһин хаардыы хаамар, улууска 80 кг ыйааһыҥҥа биир күүстээх бөҕөс күөрэс гынар, ол эрэн Харлампий улаханнык ыалдьар, киһитэ кини буолан эмтэнэн, ыар ыарыыны охсуһан үлэтигэр тахсар, өссө 2-3 сылтан бэттэх тустан көрөр да, уруккута хантан кэлиэй. Харлампий билигин саҥа 40-н ааһан эрэр, ветераннарга күүскэ тустуоҕа  хааллаҕа. Ол эрэн залтан, тустуу көбүөрүттэн, күрэхтэһииттэн арахпат, санаа күүһэ диэн итини этэн эрдэхтэрэ.