Семен Тимофеев Саха Республикатын икки төгүллээх чемпиона, 2 төгүл II м призера. 2012 с. Индияҕа ыытыллыбыт Азия континенын чемпионатын кыайыылааҕа, СР хапсаҕайга чемпионатын 55 кг, 62 кг ыйааһыннаахтарга чемпиона. Саха сиригэр бэрт аҕыйах бэртэр икки ыйааһыҥҥа бастыыллар, ол курдук Василий Стручков, Андрей Яковлев, Юрий Андреев, Максим Васильев, Семен Семенов, онтон Үөһээ Бүлүүгэ Степан Родионов, Илья Мордовской иккилии ыйааһынынан аҥардастыы айбардыыллар.

         Сеня олох кыра эрдэҕиттэн тустара уонна мас тардыһара. Оскуолаҕа үөрэнэ сылдьан улахан дьону кытта тэҥҥэ тустар буолбута. Илиитигэр, атаҕар лаппа күүстээх буолан, ону таһынан хапсаҕай албастарын баһылаабыт буолан ситиһиилэр кэлэллэрэ. Кини тустарыгар кимтэн да чаҕыйбат уонна үгүс хапсыһыытын бэйэтэ тустар стилигэр киллэртээн, көбүөр ис-тас өттүн хонтуруоллаан тустар. Бу кэмҥэ Семен сабаҕатыйан 70 кг ыйааһыҥҥа көһөн тустан эрэр. Бу ыйааһыҥҥа да үчүгэй түмүктэри ситиһиэн сөптөөх, ол курдук үрдүк уҥуохтаах, атаҕынан тэбэр, олуйар, илиитин күүһүнэн соччо улаханнык сабырыйтарбат, саамай эрэнэрэ кимтэн да толлубат, чаҕыйбат, чугуйбат. Сеня Армияҕа сулууспалаан баран Дьокуускай куоракка кыра кэмҥэ олоро сылдьыбыта, онтон Үөһээ Бүлүүгэ, Кырыкыйга кэргэнин дойдутугар олоро сылдьыбыта. Куоракка тустубатаҕа, дойдутугар кэлээтин тустан барбыта. 2009 с. Ньурбаҕа ыытыллыбыт республика чемпионатыгар 55 кг ыйааһыннаахтарга I м ылбыта. Бу тустууга кими да тулуппатаҕа, эһиилигэр Чурапчыга 55 кг ыйааһыннаахтарга II м ылбыта, биир хамаандаттан тустар Н. Егоровтан (Ороһу) охтубута. 2011 с. 55 кг ыйааһыҥҥа тустан хотторбута, онно наһаа элбэх ыйааһыны үүрэн хотторбутунан аны 62 кг ыйааһыҥҥа көһөрүн туһунан кэпсэтии буолбута. Эһиилигэр 62 кг ыйааһыҥҥа көһөн республика чемпионатыгар II м ылбыта,  2014 с. П.Е. Алексеев 75 сааһыгар аналлаах чемпионат Дьокуускай куоракка тэриллибитэ, бириис да үчүгэй этэ. Республика урукку президенэ В. Штыров 75 тыһ. солк. Петр Алексеев тустубут ыйааһыныгар 62 кг туруорбута. Саха сирин бастыҥнара бары туста кэлбиттэрэ, 104 бөҕөс бу ыйааһыҥҥа суруйтарбыта. Бу тустууга Үөһээ Бүлүү бөҕөһө ордук аһыллан тустубута, хас эргиир ахсын саха бастыҥ хапсаҕайдьыттара, спорт маастардара түбэһэн тусталлара. Хапсаҕай аныгы быраабылатынан хотторбут бөҕөс “Б” бөлөххө түһэр, онон хотторуута суох бөҕөстөр салгыы тусталлар. 104 бөҕөс тустуутугар финалга дылы алтата хоттоҕуна бастакы миэстэни былдьаһар бырааптанар. Семен Тимофеев алта бөҕөһү хотон финалга тахсар, үгүстэрин ыраастык хотор, көрөөччүлэр үрдүк биһирэбиллэрин ылар. Күрэхтэһии элбэхтик буолар сиригэр бастыҥ техникалаах, көбүөр хаһаайына буолар, утарсааччыларын кыайа-хото тутар бөҕөстөрү сөбүлүү көрөн хайа улууһуттан тутулуга суох ыалдьаллар. Ол курдук хапсаҕай тустууга ордук саха ааттаахтарыгар былыр-былыргыттан аныаха дылы аатырбыт бөҕөстөргө “көтөҕөр кран” диэн ааттаах Сергей Ли-Фуга, ат курдук тэбиилэрдээх П. Алексеевка, утарсааччыларын үөс-батааска биэрбэккэ охтортуур Ю. Андреевка, утарсааччытын бэрт дэбигис охтортуур Абый Баһылайга (В. Стручков), кимниин да туһуннун араас элбэх албастаах, олус үчүгэйдик туттан-хаптан тустар С. Семеновка көрөөччүлэр ордук хото ыалдьаллар, кэрэ кэпсээн, сэһэн, номох оҥостоллор. Син ол курдук Семен Тимофеев тустууну таптааччылар харахтарын толорбута, Үөһээ Бүлүү хапсаҕайа уратылааҕын, элбэх албастааҕын, атаҕынан ордук туттан тусталларын, атахтатан баран Чөҥкөй Дьөгүөр курдук утары бырахсан кыайыылаах тахсалларын көрдөрбүтэ. Бу көбүөргэ Семен сэттэ  бөҕөһү утуу-субуу хоппута, ол иһигэр спорт маастардара И. Егоров (Хаҥалас), А. Павлов (Чурапчы), Д. Ушницкай (Бүлүү), А. Львов (Сунтаар), И. Бугулов (Дьокуускай), Егор Дмитриев (Бүлүү) киниттэн хотторуу хомолтотун билбиттэрэ, финалга Уус-Алдан ааттааҕа М. Захаров атахтаан баран утары албаска түбэспитэ.