Петр Петрович 1934 с. Үөһээ Бүлүү оройуонун Мэйик нэһилиэгэр төрөөбүтэ.

         Петр 1953 с. “Трудовой” ыччат-комсомольскай биригээдэтигэр биригэдьииринэн таһаарыылаахтык икки сыл үлэлээбитэ, 19 саастааҕар Бүтүн Союзтааҕы быыстапкаҕа кыттар чиэскэ тиксибитэ. Онтон салгыы Ленин аатынан колхозка оҕуруокка биригэдьииринэн сылдьан II Боотулуу нэһилиэгэр депутатынан талыллан, нэһилиэк Советын председателинэн, 1966-1969 сс. Хоро нэһилиэгин Советын председателинэн үлэлээбитэ. Онтон кэлин салгыы Үөһээ Бүлүү райсоветын уопсай отделыгар сэбиэдиссэйдээбитэ.

         Кини 1980 сылтан Үөһээ Бүлүү бөһүөлэгин Советын депутатынан хас да ыҥырыкка талыллан, общественнай бэрээдэги көрүү бастайааннай комиссиятыгар председателлээбитэ. Онно оройуоннар куоталаһыыларыгар бастаан көһө сылдьар Кыһыл Знамянан наҕараадаламмыттара. Ити сылга Саха АССР Ис Дьыалатын министерствотын уонна оройуоннааҕы милиция отделын Бочуотунай грамоталарынан наҕараадаламмыта. Петр Петрович ССКП кэккэтигэр 35 сыл устата бэйэтэ этэрин курдук чиэһинэйдик, үтүө суобастаахтык үлэлээбитэ. Ону сэргэ республикаҕа уонна оройуоҥҥа спорт сайдыытыгар элбэх сыратын биэрбитэ.

         Петр Петрович 1969 с., Манчаары Спартакиадатыгар Мэҥэ-Хаҥаласка ветераннарга тустан III м ылбыта, онтон Буучугурас бирииһин иһин оройуоҥҥа хапсаҕайдаһан тустууга III призер буолбута, 1973 с. Манчаары Баһылай IV Спартакиадатыгар Дьокуускай куоракка II призер буолбута, 1974 с. Буучугурас бирииһин иһин оройуоҥҥа хапсаҕайдаһан тустууга чемпионнаабыта.