Анатолий 1958 с. олунньу 13 к. I Боотулуу нэһилиэгэр Охонооһой Уйгуров дьиэ кэргэнигэр төрөөбүтэ. Кини 1975 с. Боотулуу оскуолатын үөрэнэн бүтэрэн “Боотулуу” совхоз рабочайынан үлэлиир, онтон 1978 с. Хабаровскай куоракка Советскай Армияҕа сулууспалыыр. Сулууспа кэнниттэн Украинаҕа Днепропетровскай куорат физкультурнай институтугар үөрэххэ киирэр. Институтка үөрэнэр кэмигэр көҥүл тустуунан дьарыктанар. ССРС спордун маастарыгар кандидат буолар. Днепропетровскай куорат чемпиона, Днепропетровскай уобалас чемпион, Украина “Зенит” обществотын чемпиона, “Зенит” общество Киин Советын чемпиона. Маршал Малиновскай Бүтүн Союзтааҕы турнирыгар III м ылар. Онон кыл-мүччү ССРС спордун маастара буолбакка хаалар. Үөрэх кэннэ Өлүөхүмэҕэ кэлэн оҕо спортивнай оскуолатыгар тренеринэн үлэлиир. Ол кэмигэр оҕо эрдэҕиттэн хапсаҕай тустуунан дьарыктаммыт буолан, Өлүөхүмэ улууһугар бэлэм бөҕөс тиийбитэ. Онон сотору буолаат 1985 с. Бүлүүгэ Манчаары X Спартакиадатыгар 53 кг чемпион буолар. Бииргэ төрөөбүтэ Роман III м ылбыта. 1986 с. П.П. Пинигин республиканскай турнирыгар II м ылар, 1991 с. П. Алексеев бирииһигэр Сунтаарга III м ылар, Анатолий Уйгуров бу тустууларынан СР хапсаҕайга маастара буолбута. Анатолий Афанасьевич “СР үөрэҕириитин туйгуна”, “Өлүөхүмэ улууһугар спорду сайыннарыы иһин” бэлиэ кавалера, үрдүкү категориялаах тренер диэн ааттаах-суоллаах. Бу кэмҥэ Анатолий иккис дойду оҥостуммут Өлүөхүмэтигэр таһаарыылаахтык үлэлии сылдьар.