П.В. Уйгуров 1980 с. Василий, Мария Уйгуровтар дьиэ кэргэннэригэр төрөөбүтэ. Бу кэмҥэ аҕата Василий Михайлович “Боотулуу” совхозка директорынан, ийэтэ Мария Михайловна библиотекаҕа үлэлииллэрэ. Кыра Павлик оҕолорго республикаҕа бастыыр иһин чемпионаттарга көҥүл тустууга сүрдээх ситиһиилээхтик оройуоҥҥа тустуталаан бастаталыыр, миэстэлэһэр Павел бииргэ төрөөбүт убайа Василий спорт маастара, республика чемпиона уонна эмиэ тренеринэн үлэлиир. Биир убайа Петр эмиэ бэркэ тустара, республика призера буола сылдьыбыта. Павел оскуолаҕа үөрэнэр кэмигэр Үөһээ Бүлүүтээҕи оҕо спортивнай оскуолатыгар биллиилээх тренер Н.Е. Афанасьевка тустуунан күүскэ дьарыктаммыта. Тохсус кылаас кэннэ Дьокуускайдааҕы Олимпийскай эрэл училищетыгар  үөрэнэ киирэр. 1997 сылга Саха Государственнай университетын физкультурнай салаатыгар туттарсан киирэр. Үөрэнэр кэмнэригэр көҥүл тустуунан, хапсаҕайынан утумнаахтык дьарыктанан ситэр-хотор, республиканскай араас турнирдар кыайыылаахтарынан буолар, эдэриттэн ыарахан ыйааһыҥҥа тустар. СГУ-га үөрэнэн үрдүк физкультурнай үөрэхтээх учуутал-тренер идэтин ылан 2002 с. И.Н. Барахов аатынан орто оскуолаҕа физкультура учууталынан үлэлээбитэ, ол эрэн тренердиир баҕата батарбакка 2004 с. Тамалакааҥҥа тренеринэн үлэлии тахсар, оҕо спортивнай оскуолатыгар тренеринэн үлэлии кэлэр. Оҕолору кытта тахсыылаахтык үлэлии сырыттаҕына Егор Николаев хапсаҕай тустууга тренеринэн ыҥырар. Павел Васильевич үтүө суобастаах үлэтэ үрдүктүк сыаналаан СР үөрэҕириитин туйгуна, “Надежда Якутии” анал бэлиэнэн наҕараадаламмыта. 2016 с. СР физкультураҕа уонна спортка туйгуна буолбута.

Саха госуниверситетыгар үөрэнэр кэмигэр уонна үөрэҕин бүтэрэн баран уонча сыл хапсаҕайдаспыта, тустар ыйааһына 80 кг. Кини ордук табыллан Бүлүү куоратыгар ыытыллар республика күрэхтэһиилэригэр тустуталаабыта. Ол курдук, В. Румянцев бирииһигэр икки сыл субуруччу чемпионнаабыта. Ол быыһыгар 2002 с. эмиэ Бүлүүгэ П. Алексеев бирииһигэр III м ылар, ити сыл хапсаҕайга Саха Республикатын спордун маастара буолар. Павел Васильевич дойдутугар 2003, 2004 сс. Буучугурас, Бычырдаан бириистэригэр миэстэлэспитэ, Клавдий Захаров бирииһин кыайбыта, Покровскайга буолбут тыа сирин оонньууларыгар IV м ылбыта.

         Ити кыайыылаах тустууларын кэнниттэн Павел Васильевич тренерскэй үлэҕэ көспүтэ, кини эрчийэр хапсаҕайдьыттара республика чемпионатыгар, хапсаҕай Федерациятын Кубогар, араас турнирдарга ситиһиилээхтик тусталлар.

         Павел Васильевичка 2017 с. бэс ыйыгар Саха Республикатын Ил Дарханын Ыйааҕынан Саха Республикатын үтүөлээх тренерин үрдүк аата иҥэрилиннэ.