Роман Афанасьевич 1960 с. төрүөх. Үөһээ Бүлүү тустууга оскуолатын иитиллээччитэ. ССРС, САССР спордун маастардара Н.П. Корякин, В.Н. Семенов бастыҥ үөрэнээччилэриттэн биирдэстэрэ буолар.

         Роман Украинскай ССР Днепропетровскай куоратыгар физическэй культура уонна спорт институтугар  ситиһиилээхтик үөрэнэн 1980 с. бүтэрэр. Студенныыр сылларыгар Украина үтүөлээх тренерэ Н.П. Махинько салалтатынан эрчиллэр. Көҥүл тустууга ССРС спордун маастарыгар кандидат нуорматын толорор. Биир дойдулаахтара биллиилээх тустууктар Д.Е. Корякин, Н.Е. Афанасьев буолан бииргэ үөрэнэн бүтэрэллэр. Таатта улууһугар Ытык-Күөлгэ оҕо спортивнай оскуолатыгар 30-тан тахса сыл тренердиир. Хапсаҕайдаһан САССР спордун маастарын үрдүк аатын сүгэр. Улуу Кыайыы 40 сылыгар анаммыт Х-с Манчаары Спартакиадатыгар 1985 с. Бүлүү куоратыгар 53 кг үһүс бириистээх миэстэни ылар, 1987 с. Аммаҕа Улуу Октябрь 70 сылыгар анаммыт XI Спартакиадаҕа 53 кг үрүҥ көмүс мэтээли иилинэр, 1990 с. XII Спартакиадаҕа 53 кг үһүс бочуоттаах миэстэни ылар.