Аркадий Прокопьевич Уларов көҥүл тустууга ССРС спордун маастара, куһааттаах тустууга Россия спордун маастара. Россия спордун маастарын аатын кини спорт национальнай көрүҥнэригэр (куһааттаах тустууга) Россия чемпионатыгар кыайан ылбыта.

         Аркадий Прокопьевич көҥүл уонна куһааттаах тустууларга элбэхтик тустубута, хапсаҕайга олох кылгас кэмҥэ эрээри чаҕылхайдык туста сылдьыбыта уонна биир да утарсааччытыгар хотторботох бөҕөһүнэн биллэр. Оскуолаҕа үөрэнэр уонна студенныыр сылларыгар төрөөбүт-үөскээбит нэһилиэгин, улууһун ыһыахтарыгар тустан өрүү бастыыр этэ. Кини бытаан тустуулаах курдук буолан баран, элбэх албастаах, туттаҕына да ыыппат бөҕөс этэ. Кини ити ыһыахтарга өрүү хапсаҕай күүстээх маастардара Ю. Павловтыын, В. Тартакыновтыын бэркэ эриһэрэ, иэл-тиэл тусталлара. Онон Аркадий күүстээх хапсаҕайдьыта чуолкай. Аркадий Прокопьевич Буучугурас бирииһэ республиканскай турнир буолбутун кэннэ, 1990 с. 60 кг тустан I м ылбыта, ити дьыл Саха АССР чемпионун үрдүк аатын ылбыта уонна ити икки кыайыыларынан Саха АССР спордун маастара буолбута. 2009 с. хапсаҕай Федерациятын Кубогар Үөһээ Бүлүү хамаандатын састаабыгар киирсэн Кубок хаһаайына буолбута.