Иван оҕо эрдэҕиттэн үчүгэйдик тустара, хапсаҕай тустууну толору баһылаабыт бөҕөс этэ, ол курдук утарсааччытын таарыйбакка да сылдьан охтортуура. Сүрдээх сытыытык атахха киирэрэ уонна чыпчылыйыах түргэнэ, төннөн тахсан сыыһа туттаран охтортуура, оннук албаһынан 60 кг ыйааһыннаахтарга улууска бастыыра, миэстэлэһэрэ, бу албастан улуус күүстээх бөҕөстөрө үгүстүк охтоллоро. Үчүгэйдик атахтыыра, илиитигэр күүстээх этэ, Саха сирин бастыҥ хапсаҕайдьыттарын кытта тэбис-тэҥҥэ, өссө хотуулаахтык да тустуон сөптөөҕө. Кини биирдэ эрэ Манчаары Спартакиадатыгар кыттыбыта уонна республика чемпионаттарыгар олох да тустубатаҕа. Бу кэмҥэ кини ыйааһыныгар биллиилээх бөҕөстөр спорт маастардара Аск. Николаев, К. Мандаров, С. Ким уо.д.а. бааллара, олор эппиэттээх күрэхтэһиилэргэ кытталлара, бу тустууктары кытта Иван тэҥҥэ тустара, сорохторун охтортуур этэ.

         Сылгыһыт идэлээх киһи дьарыга мөлтөх буолара, саамай тустуу ыытыллар кэмигэр сылгы көрүүтүн үгэнэ буоларын бары билэбит.

         Иван тустар кэмигэр маастар нуормалаах турнирдар олох аҕыйах этилэр, биирдэ эмит буоллаҕына даҕаны кини үлэтиттэн быыс булан туста кэлбэтэ. Биир кэмҥэ Мэҥэҕэ Саха сирин сылгыһыттарын улахан ыһыаҕа тэриллибитэ, бу ыһыахха улахан тустуу буолбута, тустуу ыйааһынынан ыытыллыбатаҕа, онон улуустартан биирдии бөҕөс кыттыбыта. Бэйэҕит билэҕит, сылгыһытынан бөҕө-таҕа, сылгыны кыайа тутар, сытыы-сымса дьон үлэлииллэрин. Онон үөһээ бүлүүлэр Уйбааны киллэрбиттэрэ. Бу тустууга Уйбаан аһыллан тустан Саха сирин сылгыһыттарын муҥутуур кыайыылааҕа буолбута, манна Уйбаан Үөһээ Бүлүү хапсаҕайын, бэйэтин албастарын дьон-сэргэ ортотугар көрдөрөн кыаҕын, сымсатын чаҕылхайдык билиһиннэрбитэ.

         Маны таһынан Иван Николаевич оройуон биир күүстээх дуобатчыта, ССРС спордун маастарыгар кандидат этэ, нэһилиэгин чиэһин дуобакка элбэхтик көмүскээбитэ.

         Уйбаан чугас аймахтара Платон, Гаврил Саввиновтар, бырааттыы Кимнэр Саха сирин бастыҥ бөҕөстөрө, онон бу аймахха тустуу, күүс-уох төрүттэриттэн сыдьааннааҕа чуолкай.

         Иван Николаевич өр сыллаах үтүө суобастаах үлэтэ, киһи быһыытынан хаачыстыбалара үрдүктүк сыаналанан төрөөбүт, олорбут, үлэлээбит нэһилиэгин бочуоттаах олохтооҕо буолбута. Өр сылларга сыспай сиэллээҕи, саханы аан дойдуга биллэрбит дьөһөгөй оҕотун иитиитигэр үтүө суобастаах үлэтэ үрдүктүк сыаналанан СР тыатын хаһаайыстыбатын үтүөлээх үлэһитэ үрдүк аата иҥэриллэн турар.

         Иван Николаевич ыар ыарыыга ыалдьан эдэрчи сааһыгар олохтон букатыннаахтык барбыта.