Егор Васильевич 1923 с. ыам ыйын 10 к. Оноҕоччут нэһилиэгэр Хоной Баһылайдаах диэн ыалга төрөөбүт. Егор аҕата Баһылай эрдэ өлөн оҕолор тулаайах хаалаллар уонна Оҥхойго эдьиийдэригэр көһөллөр. Дьөгүөр Оҥхой 4 кылаастаах оскуолатын бүтэрэн, 1937 с. Боотулуу 7 кылаастаах оскуолатыгар үөрэнэр. 1940 с. оскуоланы бүтэрэн “Кыһыл Олох” холкуоска үлэлиир. Бу кэмҥэ сут-кураан туран олох ыарыыр, бу кэми баттаһа аны сэрии саҕаланар. Ньукулай, Дьөгүөр Федотовтар 1942 с. бэс ыйыгар сэриигэ бараллар. Дьөгүөр I-кы Белорусскай фроҥҥа сэриилэһэр. Белоруссияны босхолоһон баран ыараханнык бааһырар, онтон Польшаны босхолоһор. Бу кыргыһыыга бааһыран үс ый кэриҥэ эмтэнэр, үтүөрээт бэйэтин чааһын эккирэтэн ситэр, салгыы Илиҥҥи Пруссияҕа тиийэн Кенигсберг куораты босхолоһор. Манна аны 1945 с. улахан контузия ылан эмиэ эмтэнэр. 1947 с. дойдутугар Боотулууга тиийэн кэлэр. Сэрииттэн кэлэн Егор Васильевич Екатерина Степановна Давыдованы көрсөн ыал буолаллар, түөрт оҕолоноллор, түөрт сиэннэнэллэр.

         Дьөгүөр сэриигэ сылдьан үүт-баас ылан да кэллэр, айылҕаттан тэтиэнэх буолан тустар этэ. Үгүс тустуутун Ньурбаҕа тиийэн баран тустубута. Тустубута ырааппыт буолан, ханна, туох куоталаһыыга тустубута биллибэт, арай, 1971 с. Манчаары Спартакиадатыгар 70 кг дылы тустан бастаабыта биллэр. Кини Саха АССР спордун маастара, ол олох чуолкай, онон буоллаҕына Манчаары Спартакиадатыгар биирдэ эрэ бастаабыт бөҕөскө ити аат иҥэриллибэт, итинтэн көстөрүнэн бу куоталаһыы иннигэр Егор Васильевич республика чемпионаттарыгар миэстэлэспитэ диэн суруйаллара чуолкай эбит.

         Егор Васильевич түөһүн “Хорсунун иһин” мэтээл, Аҕа дойду Улуу сэриитин I степеннээх уордьана, “Кенигсберг куораты ылыы иһин”, “Германияны кыайыы иһин”, “Бойобуой үтүөлэрин иһин” мэтээллэр киэргэтэллэрэ, ону таһынан 55 үлэ стажтаах үлэ ветерана, спорт ветерана.