ССРС народнай учуутала М.А. Алексеев аатынан Үөһээ Бүлүүтээҕи республиканскай лицей-интернат 10 кылааһын үөрэнээччитэ, шахматка Россия спордун маастарыгар кандидат Марк Борисов шахматка бэйэтин  өйдүүр буолуоҕуттан оонньуур. Бу мындыр, өйдөөх дьон оонньууларыгар кинини төрөппүттэрэ сыһыарбыттара. Марк оскуолаҕа киирэн баран маастарга кандидаттар Д.Д. Донской, Ю.В. Родионов үөрэнээччилэргэ ыытар шахматнай секцияларыгар дьарыктанан барбыта уонна улууска, республикаҕа ыытыллар үөрэнээччилэр күрэхтэһиилэригэр элбэхтик чемпионнаабыта, призердаабыта. Марк 6-7-8 кылаастарга үөрэнэ сылдьан улахан дьону кытта тэҥҥэ оонньуур буолбута, республикаҕа, Уһук Илин уонна Сибиир Федеральнай уокуругар элбэх күрэхтэһиилэри, турнирдары кыайан, 8 кылааска үөрэнэ сылдьан Россия маастарыгар кандидат буолбута.

         Марк улахан кыайыыларыттан бэрт кылгастык билиһиннэрдэххэ, 2015 с. Бурятияҕа ыытыллыбыт ХХII норуоттар икки ардыларынааҕы “Байкальские зори-2015” улахан дьон турнирдарын кыайбыта, 2016 с. Уһук Илин уонна Сибиир Федеральнай уокуругун чемпионатыгар Саха сирин хамаандатыгар киирсэн бастаабыта.

         Марк физиканы-математиканы дириҥэтэн үөрэтэр үөрэх кыһатыгар ситиһиилээхтик үөрэнэр уонна шахматынан үлүһүйэн туран дьарыктанар. Киниэхэ ситиһиилээх үөрэҕи, шахмат күрэхтэһиилэригэр кыайыыны баҕарыаҕыҥ!