Д.Д. Донской 1965 с. Үөһээ Бүлүү оройуонун II Үөдүгэй нэһилиэгэр төрөөбүтэ. Дмитрий олох кыра сааһыттан дуобат, саахымат оонньуутунан үлүһүйбүтэ, оскуолаҕа улахан кылаастарга үөрэнэр сылларыгар бэйэтэ саахымат теориятын үөрэтэн билиитин хаҥаппыта, үөрэнээччилэргэ ыытыллар оройуоннааҕы күрэхтэһиилэргэ кыайталаан элбэх төгүллээх чемпион, призер буолуталаабыта, улахан дьоннор күрэхтэһиилэригэр эмиэ бириистээх миэстэттэн түспэт буолбута.

         Дмитрий Дмитриевич шахматка элбэх республиканскай турнирдарга ситиһиилээхтик кыттар, өрүү миэстэлэһэн биир дойдулаахтарын, саахыматы таптааччылары үөрдэр.

         Дмитрий Дмитриевич 2006 с. ыытыллыбыт Саха Республикатын норуоттарын оонньууларыгар бэйэтин дуоскатыгар I м ылбыта, Үөһээ Бүлүү улууһуттан саахымакка маҥнайгынан Россия спордун маастарыгар кандидат буолбута. Кини илиитин иһинэн элбэх оҕо саахымат үтүөкэннээх оскуолатын аастылар, үгүс үөрэнээччи республикаҕа оҕолорго уонна улахан дьоҥҥо да ыытыллар күрэхтэһиилэргэ мэлдьи бириистээх миэстэлэри ылаттыыллар, элбэх оҕо өссө оскуолаҕа үөрэнэ сылдьан I разрядтаннылар, Россия спордун маастарыгар кандидат буоллулар. Ол курдук кини эрчийэр, такайар оҕолоруттан Юрий Родионов, Марк Борисов, Владлен, Семен Полятинскайдар, Афанасий Назаров, Саина, Евдокия Николаевалар о.д.а. республика таһымыгар бастыҥнары кытта илин-кэлин былдьаһар күүстээх саахыматчыттар үүнэн таҕыстылар.