Үөһээ Бүлүү улууһун өр сылларга бастыҥ саахыматчыта

         1965 с. саахымат оонньуутугар САССР XXIV чемпионата буола турдаҕына “Эдэр коммунист” хаһыакка “Хапсаҕай маастара, саахымат бастыҥа” диэн төбөлөөх ыстатыйа тахсыбыта. Онно Үөһээ Бүлүү саахыматчыта Игнат Николаев саахымат чемпионатыгар республика бастыҥнара В. Ястребов, В. Савельев тэҥ очколаах инники иһэллэрин ситэн ылбытын уонна үһүөн чемпионаты баһылаан-көһүлээн иһэллэрин туһунан суруйбута. Онтон сотору буолаат бу үс бастыҥнар тэҥ очколаах чемпионаты түмүктээбиттэрин туһунан суруллубута. Ити кэмҥэ Игнат Алексеевич Николаев Далыр оскуолатыгар математика учууталынан үлэлиирэ уонна саахымат күрэхтэһиилэригэр ситиһиилээхтик кыттара. Игнат Николаев ити сылларга шахматка күүскэ оонньуура, Саха АССР сүүмэрдэммит хамаандатын састаабыгар киирэн Сибиир уонна Уһук Илин хамаанданан куоталаһыыларыгар 1967 с. I м ылбыттара, Уһук Илин зонаҕа “Урожай” ДСО күрэхтэһиитигэр бэйэтин дуоскатыгар икки төгүл бастаабыта. Ити дьыл Россияҕа “Урожай” ДСО Киин Сэбиэтин күрэхтэһиитигэр Саратов куоракка II доскаҕа III м ылбыта. Игнат Алексеевич Үөһээ Бүлүү оройуонун, Бүлүү зонатын элбэх төгүллээх чемпиона.

         Игнат Алексеевич Николаев быйыл 80 сааһын туолар, ол эрээри саахымат-дуобат оонньуутугар ветераннар, эдэрдэр ортолоругар кыахтаахтык оонньоһо сылдьар, кэккэ ситиһиилэрдээх.