1931 с. I Үөдүгэй нэһилиэгэр “Фрунзе” холкуоска төрөөбүтэ. Ийэлэрэ үйэтин тухары олорон турбакка холкуоска сүөһү көрөрө. Ийэлэрэ суох буолуоҕуттан кинилэр олохторо лаппа ыараабыт. Аҕалара хаайыыга түбэспит. Ол саҕана сокуон кытаанаҕа. Онон төһө да хоргуйбутуҥ иһин, бэл бэйэлээх бэйэҥэ сүөһүгүн сиириҥ сатаммат эбит. Туох ордору барытын фроҥҥа уонна государствоҕа туттараллар эбит. Ол дойдуттан ким да тыыннаах эргиллибэт, онон аҕатын хаһан да көрбөтөх.

Николай Петрович сахаҕа ортону үрдүнэн уҥуохтаах, номоҕон сэбэрэлээх, саҥата-иҥэтэ суох, мэлдьи олус сэмэйдик тутта сылдьар киһи.

Кэргэнэ Мария Михайловна Павлова: “Мин кэргэмминээн, Павлов Николай Петровичтыын, ыал буолан олорбуппут сайын 50 сылбытын туолуох этибит, 80 сааһын аҕыйах ый ааһан баран, 2011 с. ахсынньы 16 к. ыарахан ыарыыттан орто дойдуттан бараахтаабыта. 1943 с. Далырга олорор аймаҕа Донской Д. уолчааҥҥа ирдэнэр докумуоннарын толорон биэрэн саҥа аһыллыбыт детдомҥа ыыппыт. Ити кэмтэн ыла кыһалҕалаах аччык олоҕо бүтэн, ыраас, сымнаҕас таҥастаах ороҥҥо утуйан, ичигэстик таҥнан, аччыктыыры умнан, кыратыгар кыһалҕа бөҕөнү көрбүт оонньообох оҕо сааһа итинэн ааспыт. Дьэ, тото аһаан, нус-хас олохтонон уон сыл детдомҥа иитиллэн олорбут. Ол үтүөтүн иһин орто дойдуттан барыар диэри советскай былааска, коммунистическай партияҕа, “Күн Сталиҥҥа” махтанара, уруйдуура, көмүскүүрэ... Кэнники ыал буолан, икки оҕоломмуппут кэннэ Благовещенскайга саҥа аһыллыбыт тыа хаһаайыстыбатын специалистарын бэлэмниир техникумҥа тутуу салаатыгар киирэн үөрэммитэ. 1971 с. үөрэҕин бүтэрэн кэлэн, 68-с сааһыгар пенсияҕа тахсыар диэри үлэлээн, дьэ тохтообута. 31 сыл устата ханна да халбаҥнаабакка аҥаардас тутуу тэрилтэлэригэр эрэ үлэлээбитэ. Олоҕун устатын тухары доҕор-атас оҥостубут саахыматынан орто дойдуттан барыар дылы дьарыктаммыта. Элбэх дипломнарынан, грамоталарынан наҕараадаламмытын мунньа сылдьыбыта 130 устуука. Соҕуруу сынньалаҥҥа бара сылдьан аара Москваҕа Анатолий Карпов сеанс биэрэригэр түбэһэн оонньоон, улахан дьолго тиксибит курдук сананан кэлбитэ. Киирии билиэтигэр илии баттатан илдьэ кэлбитэ. Хас көлүөнэ оҕолор, улахан дьон кинини кытта саахыматтаан, дьарыктанан саахымат мындыр оонньуутун абылаҥар ылларбыттара буолуой дии саныыбын. Кырдьан, үлэтиттэн уурайан баран, хаһаайыстыба туох баар түбүгүн барытын бэйэтигэр ылыммыта. Күһүн сир аһын арааһын хомуйан сылайан-элэйэн да кэллэр, олус астынара. Ньукулайым улахан оҕомсох киһи этэ. Оҕолор кыраларыгар, манна бөһүөлэккэ үлэлии сылдьан, эбиэт кэмигэр уонна киэһэ үлэтин кэннэ таҥыннаран таһааран биэрэккэ күүлэйдэтэн киллэрэрэ. Ыалларын оҕолоругар маҕаһыынтан атыылаһан иһэн кэмпиэт түҥэтэр идэлээх эбит. Ону суох буолтун кэннэ хас да ыал оҕолоро кэпсээбиттэрин уонна аһыйбыттарын туһунан дьонноро эппиттэрэ. Аҕабыт туһунан сырдык өйдөбүл оҕолоругар, сиэннэригэр өлбөөдүйбэккэ уһуннук хаалыа диэн эрэнэ саныыбын”.