В.Е. Полятинскай 1984 с. Үөһээ Бүлүү сэлиэнньэтигэр төрөөбүтэ.

         Владлены уонна Семену аҕалара, врач, саахыматчыт Егор Иванович Полятинскай бэрт кыра саастарыттан саахымат оонньуутугар үөрэппитэ. Владлен оскуолаҕа үөрэнэ киирэригэр саахымакка үчүгэйдик оонньуур буолбута. Кинини оскуолаларынан эдэр талааннары көрдөөн дьарыктыыр баҕалаах тренер Д.Д. Донской таба көрөн секциятыгар ылан, саахыматынан олохтоохтук дьарыктанан барбыта. Владлен Үөһээ Бүлүүтээҕи физиканы, математиканы дириҥэтэн үөрэтэр Үөһээ Бүлүүтээҕи 2-с №-дээх орто оскуоланы, онтон салгыы Дьокуускайдааҕы тыа хаһаайыстыбатын государственнай Академиятын ситиһиилээхтик үөрэнэн бүтэрбитэ, билигин Үөһээ Бүлүүтээҕи үүтү астыыр комбинакка идэтинэн үлэлиир.

         Владлен оскуолаҕа үөрэнэ сылдьан оҕолорго республика чемпиона буолбута, элбэх республиканскай күрэхтэһиилэр кыайыылааҕа, призера буолбута, 2006 с. Россия спордун маастарыгар кандидат аатын ылбыта.