С.Е. Полятинскай 1987 с. Үөһээ Бүлүү сэлиэнньэтигэр эмчиттэр дьиэ кэргэннэригэр төрөөбүтэ.

         Семену оскуолаҕа киириэн инниттэн аҕата Егор Иванович саахыматтыырга үөрэппитэ. Оскуолаҕа начаалынай кылаастарга үөрэнэ сырыттаҕына тренер Д.Д. Донской секцияҕа ыҥыран, саахыматынан үлүһүйэн туран дьарыктаныытын саҕалаабыта. Семен ССРС народнай учуутала М.А. Алексеев аатынан Үөһээ Бүлүүтээҕи гимназияҕа үөрэнэр сылларыгар оҕолорго ыытыллар элбэх республиканскай күрэхтэһиилэргэ бастаабыта уонна призердаабыта, кэлин, Саха госуниверситетын Мирнэйдээҕи филиалыгар үһүс кууруска үөрэнэ сылдьан Россия спордун маастарыгар кандидат буолбута, улахан дьоҥҥо эмиэ элбэх күрэхтэһиилэри, турнирдары кыайбыта.

         Семен билигин М.Т. Егоров аатынан Үөһээ Бүлүүтээҕи 2-с №-дээх оскуолаҕа идэтинэн үлэлиир, кэргэннээх.