Ю.В. Родионов 1982 с. Үөһээ Бүлүү сэлиэнньэтигэр төрөөбүтэ.

         Юрий саахымат, дуобат оонньуутунан өссө оҕо саадыгар сылдьар эрдэҕиттэн саҕалаан таттаран оонньуур буолбута, оттон оскуолаҕа үөрэнэр кэмигэр шахмат секциятыгар суруттаран анаан-минээн баҕаран туран дьарыктанар буолбута. Бастакы тренерэ Дмитрий Дмитриевич Донской Юрийы саахымат алыптаах эйгэтигэр сиэтэн киллэрэн билигин улуус, республика биир күүстээх оонньооччутун быһыытынан биллэр. Юрий Владимирович билигин тренерэ Дмитрий Дмитриевич Донскойдуун үөрэнээччилэри саахымакка уһуйаллар, эрчийэллэр. Кинилэр дьарыктаабыт оҕолоруттан улуус, республика чемпионнара уонна призердара үүннүлэр, саахымат алыптаах оонньуутунан дьарыктаныан баҕалаах оҕолор элбии туралларынан кинилэр эрчийэр оҕолорун кэккэлэрэ хаҥыы туруоҕар саарбахтаныллыбат.

         Юрий Владимирович ХИФУ-га үөрэнэр сылларыгар үөрэҕин кытта тэҥҥэ дьүөрэлээн саахыматынан күүскэ дьарыгырбыта, араас республиканскай таһымнаах күрэхтэһиилэргэ кыттан маастарыстыбатын чочуйбута, үгүстүк миэстэлэспитэ, Саха сирин сүүмэрдэммит хамаандатыгар киирсэн Уһук Илин уонна Сибиир зонатыгар, Россияҕа тахсыылаахтык оонньообута, Россия спордун маастарыгар кандидат аатын ылбыта.

         Кини 2006 с. СР норуоттарын спортивнай оонньууларыгар I дуоскаҕа I миэстэни, 2012 с. “Якутский олень” норуоттар икки ардыларынааҕы турнирга III м, 2014 с. Уһук Илин уонна Сибиир зонатыгар хамаанданан III м, оттон 2016 с. бу зонаҕа хамаанданан I м ылбыта.

         Юрий Владимирович республикаҕа үрдүкү лигаҕа онус сылын ситиһиилээхтик, тахсыылаахтык оонньуур. Киниэхэ тренердиир үлэтигэр уонна өркөн өйдөөхтөр оонньуур саахыматтарын күрэҕэр үрдүк ситиһиилэри баҕарабыт.