Петр Федотович Үөһээ Бүлүү улууһун бастакы көлүөнэ дуобатчыттарыттан биир бастыҥнара, бастакынан ССРС спордун маастарын нуорматын толорбута.

Борисов Петр Федотович 1950 с. муус устар 3 к. Үөһээ Бүлүү улууһун Ороһу нэһилиэгэр биэс оҕолоох Борисовтарга үһүс оҕонон төрөөбүтэ. Кыратыгар ыарыһахтаан балыыһа бөҕөтүн кэрийбитэ. Оскуолаҕа сылдьан дуобатынан ордук сөбүлээн оонньуур этэ. Дуобат кинигэлэрин суруттаран, бэйэтэ комбинациялары  суоттаан дьарыктанар этэ. Нам орто оскуолатын 1970 с. бүтэрбитэ, 1975 с. диэри Бүлүү уонна Үөһээ Бүлүү спорт комитеттарын председателинэн, инструкторынан үлэлээбитэ. Петр Федотович 1975 с. Саратов куоракка тыа хаһаайыстыбатын институтугар зооветеринарнай отделениеҕа үөрэнэ киирбитэ, онтон ыла утумнаахтык дуобатынан дьарыктанан 1978 с. ССРС спордун маастарын нуорматын толорбута.

Петр Федотович 1980 с. үөрэҕин ситиһиилээхтик бүтэрэн Бүлүү оройуонугар «Орто Бүлүү» совхозка, онтон Ленскэй оройуонун  «Ленскэй» совхоһугар уон сыл кылаабынай зоотехнигынан үлэлээбитэ. Үчүгэй үлэтин иһин тыа хаһаайыстыбатын министерствотыттан элбэх Бочуотунай грамоталарынан наҕараадаламмыта. Петр Федотович Ленскэй куорат хас да оскуолаларыгар оҕолору дуобакка, саахымакка уһуйбута, тренеринэн үлэлиир кэмигэр дьарыктыыр оҕолоро биэс төгул республикаҕа чемпионнарынан, призердарынан буолуталаабыттара.

Төрөппут кыыһа Борисова Ася 1996 с. бастакы «Азия оҕолоро» норуоттар икки ардыларынааҕы спортивнай оонньууларга саахымакка 2 миэстэни ылбыта.

Петр Федотович Саха сирин чиэһин элбэхтик көмүскээбитэ, РСФСР призердарынан буолуталаабыта. Үөһээ Бүлүү оройуонун дуобакка соҕотох ССРС спордун маастара, Саха сиригэр физкультурнай хамсааһын 75 сылыгар аналлаах өйдөбүнньүк мэтээлинэн уонна грамотанан наҕараадаламмыта.

Петр Федотович ыарахан ыарыыттан 2000 с. олунньу 1 к. биһиги кэккэбититтэн туораабыта.

Кини кэргэнэ Мария Марковна, уола Сергей Ленскэй куоракка олороллор. Кыыһа Ася Благовещенскай куоракка олорор, үлэлиир, сиэнэ Вика 8-с кылааска үөрэнэр.

Сайын уоппускатыгар кэллэҕинэ маастарга кандидат Павлов Капитон Кондратьевичка баран дуобаттаан, саҥа комбинациялары суоттаан, ырытан опыттарын хаҥатынааччылар, өссө нэһилиэктэригэр күрэхтэһии тэрийэн ыытааччылар.

Үөһээ Бүлүүлэртэн дуобакка ССРС спордун бастакы маастара Петр Федотович сырдык мөссүөнэ умнуллуо суоҕа, кини сырдык кэриэһигэр аналлаах дуобат күрэхтэһиилэрэ төрөөбүт нэһилиэгэр, оскуолатыгар ситимин быспакка ыытыллы туруохтара.