Үөһээ Бүлүү оройуонугар дуобат маассабайдык сайдыытыгар дьону көҕүлээһиҥҥэ, дьарыктааһыҥҥа маассабай үлэни ыыппыт, пропагандалаабыт киһинэн буолар Иванов Макар Григорьевич. Ороһу нэһилиэгэр 1922 с. төрөөбүтэ. Оройуон бастакы үөрэхтээхтэриттэн биирдэстэрэ. Оҕо сааһыттан талах дуобаттан саҕалаан утуйар да уутун умнан туран бу дьикти дьарыкка ылларбыта.

Н.Г. Чернышевскай аатынан Бүлүүтээҕи педучилищены ситиһиилээхтик үөрэнэн бүтэрээт олоҕун оҕону иитиигэ, үөрэтиигэ анаабыта. Учуутал хаһыатыгар дуобат задачалара тахсарын көтүппэккэ суоттуура, нуучча биллиилээх дуобатчыттарын кытта суругунан оонньуура, дуобакка аналлаах кинигэлэри мунньара. Оройуоҥҥа буолар дуобат күрэхтэһиилэригэр дуобат угаайы албастарын билбитин, үөрэппитин кэпсиирэ. Оҕолорго ыытыллар дуобат күрэҕэр анаан-минээн сылдьара, барытын сурунан бэлиэтэнэрэ. Оройуонугар бииргэ оонньообут, бастакы саҕалаабыт дуобатчыттара Прокопьев П.С., Тобохов В.Р. буолаллар. Кинилэр оройуоҥҥа дуобат сайдыытыгар кырата суох кылааты киллэрсибиттэрэ. Улахан дьоҥҥо, оҕолорго анаан дуобат күрэҕин ыыталлара. Макар  Иванов үйэ аҥаара учууталлаабыт кэмигэр оройуонун элбэх нэһилиэгэр, Хоту Анаабырга үлэлээбитэ. Ол, усталаах туоратыгар дуобаты кытта сылдьыбыта. Спорт энтузиаһа,  бастакы разрядтаах дуобатчыт этэ.