Анатолий Петрович 1946 с Үөһээ Бүлүүгэ төрөөбүтэ. Сунтаар Кириэстээҕэр 7 кылааһы бүтэрэн Дьокуускайдааҕы сибээс техникумугар үөрэххэ киирэн бүтэрбитэ. Дьокуускай тыатыгар Тулагыга радиостанцияҕа 2 сыл үлэлээбитэ. Советскай Армия кэккэтигэр сулууспалыыр. 1970 с. Далырга ийэтигэр чугаһаан үлэлии кэлбитэ. Пенсияҕа тахсыар диэри Далырга олорор, үлэлиир. Бастаан сибээс операторынан, онтон 2006 с. дылы эҥкилэ суох почта отделениетын начальнигынан үлэлиир.

Икки пятилетка Соцкуоталаһыытын кыайыылааҕа, элбэх ахсааннаах оройуоннааҕы Саха сирин сибээһин управлениетыттан Почетнай грамоталардаах.

Анатолий Петрович үчүгэй дуобатчыт этэ. Кини дуобатынан 1975 с. дьаныардаахтык дьарыктанан оонньоон барбыта. Бииргэ дьарыктанар дьоннорунан сүрүннээн коллегалара Васильев Василий, Донской Валерий, Федоров Владимир уонна оскуолаттан Николаев Игнат Алексеевич этилэр. Кэлин Афанасьев Юрий, Петров Сергей оонньууллар. Дуобатынан дьарыктаналларыгар бастаан “домбрето” диэн латыштыы тахсар сурунаалы булан эрчиллибиттэр, кэлин атын анал сурунаалларынан дьарыктаммыттар. Сүрүн опыттарын бэйэ-бэйэлэрин кытта оонньоон, күрэхтэһэн, күрэхтэһии тэрийэн ылаллар этэ. Далыртан бастакынан 1987 с. дуобат маастарыгар кандидатын нормативын Васильев Василий Васильевич толорбута, кини кэннэ 1990 с. Николаев Игнат Алексеевич,  ол кэннэ үсүһүнэн  Анатолий Петрович 1993 с. маастарга кандидат нормативын толорбута. Анатолий Петровиһы кытта бииргэ оонньообут доҕотторо кэпсииллэринэн, оонньууларын куоракка суругунан ыытан бэрэбиэркэлииллэр эбит, ол онно Анатолий Петрович оонньуута дуобат оонньуутун ирдэбиллэригэр күүскэ эппиэттэһэр эбит. Куоракка көһөн тиийэн куорат саахымат уонна дуобат кулуубугар сылдьан оонньуура, ол да буоллар дойдутугар  Үөһээ Бүлүүгэ кэллэ да, табаарыстара буолан мустан хайаан да дуобакка күрэхтэһэллэр эбит. Ол курдук өлүөр дылы дуобаты сөбүлээн оонньообута. Оҕолоруттан үс кыра уол дуобакка оонньууллар даҕаны, спортсмен быһыытынан оонньуур таһымҥа билиҥҥитэ тахса иликтэр.