Саха Республикатын спордун ветерана Калиник Титович 1934 с. алтынньы ый 25 к. Үөһээ-Бүлүү оройуонун Өргүөт нэһилиэгэр колхозтаах дьиэ кэргэнигэр төрөөбүтэ. Үрдүк үөрэхтээх саха тылын уонна литературатын учуутала идэлээх.

    Калиник Титович дуобатынан 1980 с. ыкса ылсан дьарыктаммыта, 1984 с. оройуон чемпиона буолбута. 1991 с. Якутскайга дуобат республиканскай Фестивалыгар баран кыттыбыта. 150-ча киһи республика араас муннуктарыттан кэлэн швейцарскай системанан 9 туру оонньообуттара. Калиник бу күрэхтэһиигэ 9-тан 6 очкону ылан ССРС маастарга кандидатын норматын толорон, Москваттан ыҥырыллан кэлбит кылаабынай судьуйа этиитинэн партияларын Москваҕа ыыттаран кандидат званиета быһа бэриллибитэ.

    Калиник иккис дойду оҥостубут Хоротугар оҕолору дьарыктаан, дуобат оонньуутугар угуйан, бэйэтинээн алта оҕо дуобакка маастарга кандидат буола үүнэн тахсыбыттара. Үлэлиир сылларыгар Хоро нэһилиэгин аһаҕас чемпионаттарын нэһилиэгин салалтатын өйөбүлүнэн хас да төгүл ыыппыта. Онно Бүлүү бөлөх оройуоннарыттан күүстээх оонньооччулар кэлэн кыттаннар күрэхтэһиилэр үрдүк таһымнаахтык бараллара, бүтэһик икки улахан күрэхтэһиигэ бииригэр 130, иккиһигэр быйыл 141 кыттааччы баара.

         Быйылгы күрэхтэһиигэ 5 бөлөххө хайдыһан оонньооһуҥҥа хоролор кыһыл, үрүҥ көмүс, боруонса барыта уон 10 мэтээллэр хаһаайыттарынан буолтара. Оҕолор үс группаҕа оонньообуттара: кыра, орто уонна улахан саастаах оҕолорго. “Улуус кэскиллээх саамай эдэр оонньооччута” диэн ааты Кэнтик орто оскуолатын начаалынай кылааһын үөрэнээччитэ Рожина диэн кыыс оҕо ылан Калиник Титович туруорбут анал бирииһин, убаһа сертификатын туппута.

         Улууска оҕолору дуобат оонньуутугар уһуйан дьарыктыыр тренердэр, учууталлар уонна төрөппүттэр элбээбиттэрэ киһини үөрдэр, инникигэ эрэли үрдэтэр.

Калиник Титович 1952 с. спорт араас көрүҥнэринэн дьарыктанар, син сөбүгэр ситиһиилэрдээҕэ, билигин 82 сааһын да туоллар, дуобат алыптаах хонуутун быраҕан, арахсар санаата суох.