Николаев Николай Илларионович 1932 с. ыам ыйын 22 к. Сис Мэйигэр төрөөбүтэ. Идэтинэн киномеханик үөрэхтээх, 1960 с. Дьокуускайга киномеханиктар курстарын үөрэнэн бутэрбитэ. Өр сылларга Мэйик нэһилиэгин Сэбиэтигэр секретарынан, бухгалтерынан үлэлээбитэ. Пенсияҕа тахсан баран “Үөһээ Бүлүү”  совхозка кадровай булчута буолбута.  Кэргэнинээн Титова Анна Николаевналыын 30-тан тахса сыл иллээхтик-эйэлээхтик олорон түөрт оҕону төрөтөн иитэн-үөрэтэн улаатыннарбыттара .

     Николай Илларионович эдэр сааһыттан спорду сэҥээрэрэ, араас көрүҥнэргэ бэйэтин боруобаламмыта. Ол курдук үчүгэйдик хайыһардыыра, теннистиирэ, бильярд оонньуура. Кэлин сааһыран иһэн нуучча дуобатынан умсугуйан дьарыктаммыта. Күн аайы сыал-сорук оҥостон элбэхтик эрчиллэрэ, бэлэмнэнэрэ. Дуобат сурунаалларын суруйтаран ылан үгүстүк туһанара, туһааннаах литератураны ааҕара, лууска ыытыллар күрэхтэһиилэргэ көтүппэккэ кыттара. Уһун кэмнээх дьаныардаах дьарык таах хаалбатаҕа. Николай Илларионович  1998 с. нуучча дуобатыгар  CCРС спордун маастарыгар кандидат нуорматын толорбута. Бэлиэ түгэни олохтоох дьаһалта кулууп дьиэҕэ үөрүүлээх быһыыга-майгыга Николай Илларионовиһы чиэстээһини тэрийбитэ. Нэһилиэк дьаһалтата бу чиэстээһини тэрийиитэ диэн киһи сааһыран да баран спортка ситиһиилэниэн сөп эбит диэн аҕамсыйа барбыт дьоҥҥо, ыччаттарга да көҕүлээһин быһыытынан буолбута.  Николай Илларионович өр кэмҥэ бииргэ алтыспыт, күрэхтэспит дуобатчыт доҕотторо улуус араас нэһилиэктэриттэн кэлэн улахан дуобат күрэҕин  ыыппыттара.

    Николай Илларионович 2000 с. ыарахан ыарыыттан күн сириттэн барбыта. Кини  сырдык аатын үйэтитиигэ нэһилиэк дьаһалтата, олохтоох оскуола учуутала, энтузиаһа Федоров В.А. көҕүлээн 2014 с. кини аатыгар нуучча дуобатыгар улуус аһаҕас турнира ыытыллар.