Павлов Капитон Кондратьевич 1937 с. атырдьах ыйын 25 к. Үөһээ Бүлүү оройуонун Ороһу нэһилиэгэр Кустук диэн бөһүөлэккэ төрөөбүтэ.

         Капитон Ороһуга 7 кылааһы, Үөһээ Бүлүүгэ орто оскуоланы, онтон салгыы Бүлүүтээҕи Н.Г. Чернышевскай аатынан педагогическай училищены үөрэнэн бүтэрэн алын кылаастар учууталларын идэтин баһылаабыта.

         Бүлүүгэ үөрэнэ сылдьан САССР бастакы үтүөлээх тренерэ Роман Дмитриевич Попов салалтатынан дьарыктанан дуобат кистэлэҥнэригэр үөрэммитэ. Оҕо эрдэҕинэ Ороһуга Капитону дуобакка оонньуурга иитиспит күтүөтэ Өлөксөй (Тоотуо) үөрэппитэ. Оччотооҕуга Ороһуга дуобат ытыктанар спорт көрүҥэ этэ. Капитон аймаҕа Макар Григорьевич, Михаил Давыдович Ивановтар дуобакка бэркэ оонньууллара. Кэнники көлүөнэ дьонтон Ороһуттан Петр Борисов, Тамара Борисова, Илья Кысылбаиков курдук күүстээх дуобатчыттар үүммүттэрэ. Петр Борисов Капитон дуобакка эрчийбит оҕото Үөһээ Бүлүү дуобатчыттарыттан бастакынан ССРС спордун маастарынан буолбута.

         Капитон дуобакка элбэх албастары, киириилэри билэр буолан, өр сылларга республикаҕа тиийэ тахсыылаахтык оонньообута.

         Капитон Кондратьевич1960 сылтан 2003 сылга диэри Саха Республикатын  норуоттарын Спартакиадатыгар дуобакка төрөөбүт оройуонун чиэһин быыстала суох көмүскээбитэ, ол аата 22 сааһыттан 66 сааһыгар диэри үрдүкү таһымҥа оонньообута. Үөһээ Бүлүү оройуонуттан бастакынан (Юрий Дмитриевы кытта тэҥҥэ) дуобакка ССРС спордун маастарыгар кандидат аатын 1976 с. ылбыта. 1979 с. саас Бүлүү бөлөх оройуоннарын саамай күүстээх дуобатчыттарын күрэхтэһиитигэр 16 киһиттэн кыайыылааҕынан тахсыбыта.

         Саха АССР норуоттарын Спартакиадаларыгар, “Урожай” ДСО республикатааҕы күрэхтэһиилэригэр, Бүлүү зонатын араас турнирдарыгар Капитон Павлов улуус биир сүрүн дуобатчытын быһыытынан өр сылларга оонньообута. 2003 с. Спартакиадаҕа бэйэтин дуоскатыгар тоҕустан 6,5 очкону ылан, төрдүс миэстэҕэ тахсыбыта, Үөһээ Бүлүү хамаандата бэһис көрдөрүүлэммитэ.

         Капитон Үөһээ Бүлүү улууһугар дуобакка саамай элбэхтик чемпионнаабыта биллэр. Ол эрээри, сэмэйэ бэрт буолан, ханна да туруорсубакка, ыраах тыаҕа Ороһуга олорор буолан, дуобакка маастар нуормалаах турнирдарга биирдэ да кыттыбатаҕа.

         Кини Бүлүүгэ бииргэ үөрэммит, эрчиллибит табаарыстара Петр Иванов, Андрей Алексеев ССРС спордун маастардарынан буолбуттара. Капитон бу дьону кытта тэҥҥэ дуобаттыыра, үксүгэр баһыйара.

         К.К. Павлов нуучча дуобатын теориятын дириҥник билэринэн атыттартан чорбойор этэ, онон кини хайа да күүстээх дуобатчыты кытта тэҥҥэ оонньооччу.

         2003 с. Капитон балачча сааһыран баран республика күүстээхтэрин кытта эриһэн, дуоскатыгар төрдүс миэстэҕэ тахсан, “буораҕа өссө да кураанаҕын” дакаастаабыта — диэн Виталий Попов “Дуобат дуоскатын хахайа” — Хаппытыан Хандыраатыйабыс” диэн ыстатыйатыгар суруйбута.

         Оскуолаҕа, интернатка үлэлиир кэмнэригэр элбэх ыччаты дуобакка уһуйбута, эрчийбитэ.