Мария 1996 с. Үөһээ Бүлүү улууһун Нам нэһилиэгэр Павловтар дьиэ кэргэттэригэр төрөөбүтэ. 2003 с. Нам орто оскуолатыгар үөрэнэ киирбитэ уонна 2014 с. орто оскуоланы кыһыл көмүс мэтээлинэн бүтэрбитэ. Билигин ХИФУ математика институтугар үһүс кууруска ситиһиилээхтик үөрэнэ сылдьар.

Кини өссө оскуола иннинээҕи оҕо уһуйааныгар сылдьан дуобакка оонньуурун сөбүлүүрэ биллибитэ, уһуйааны “Маша бастыҥ дуобатчыт” диэн илиинэн оҥоһуу мэтээллээх бүтэрбитэ, кини бу бастакы мэтээлэ этэ. Иккис кылааска үөрэнэ сылдьан,  дуобатка ССРС спордун маастарыгар кандидат Константинов Владимир Семенович ыытар сиэксийэтигэр дьарыктаныан баҕарбытын кыра диэн ылбатаҕа, онтон үһүс кылааска дьэ киллэрэн эрчиллиитин саҕалаабыта. В.С. Константинов дьиҥнээхтик ис сүрэҕиттэн оҕолору дуобат дьиктилээхэй хонуутугар дьарыктыыра, онон Маша спорт бу киһини толкуйдатар уонна интэриэһинэй дьарыгар сирдээбит киһитинэн Костантинов В.С. буолар.

Бастакы өрөспүүбүлүкэтээҕи күрэхтэргэ төрдүс кылааска үөрэнэ сырыттаҕына тренерэ В.С. Константинов салайан илдьэ сылдьыбыта, оҕолору олус эппиэтинэстээхтик,   кыһамньылаахтык илдьэ сылдьара, дойдуларыгар кэллэхтэринэ ким хайдах оонньообутун сиһилии төрөппүттэригэр кэпсиир буолара уонна өрүү “дьэ, өссө үчүгэй буолуохпут” диэн санаатын көтөҕөр идэлээҕэ. Онтон кэнники сылларга тренердэринэн Россия дуобакка маастарга кандидаттара А.Т. Аввакумова, С.Г. Терентьева буолбуттара.

Ситиһиилэрэ: Үөһээ Бүлүү улууһун нуучча уонна 100 харахтаах дуобатыгар хас да төгүллээх чөмпүйүөнэ, призера; 2007, 2008, 2009, 2010, 2011, 2013 сс. улуус оскуола оҕолоругар бастыҥ спортсмена; ССРС спордун маастара, республика 13 төгүллээх чемпиона, Аан дойду, Европа призера Н.Н. Саввинов өрөспүүбүлүкэтээҕи күрэҕин хас да төгүллээх кыайыылааҕа, призера; 2008, 2009 сс. республикатааҕы дуобат Фестивалын кыайыылааҕа; 2012, 2013 сс. гроссмейстердар республикатааҕы, регионнааҕы турнирдарын кыайыылааҕа; 2011, 2013, 2014 сс. республика нуучча дуобатыгар, 100 харахтаах дуобатыгар биирдиилээн күрэҕин, турнирдарын кыайыылааҕа, призера; 2010 с. “Үрүҥ түүн” нуучча дуобатыгар норуоттар икки ардыларынааҕы турнир Санкт-Петербург куоракка кыайыылааҕа; “Үрүҥ түүн” турнир хамаанданан күрэххэ призера; Россия нуучча дуобатыгар түргэн оонньууга чемпионатын кыайыылааҕа (Всеволожск — 2011 с.); 2015, 2016 сс. ХИФУ нуучча дуобатыгар күрэхтэрин кыайыылааҕа.