Прокопьев Прокопий Степанович 1920 с. Боотулууга дьадаҥы дьиэ кэргэҥҥэ төрөөбүтэ, эһэтигэр Степан Прокопьевичка-Тааппан оҕонньордооххо иитиллибитэ. Эһэтэ сиэнин аралдьытаары талах дуобат оҥорон биэрбитинэн күнүн ыаһаҕын ыытар эбит.

         Боотулуу сэттэ кылаастаах оскуолатын бүтэрэн баран Бүлүүтээҕи педагогическай училищеҕа үөрэммитэ, 1938 с. училищены бүтэрэн учуутал буолбута. Прокопий Степанович Сургулуукка, Боотулууга, Дүллүкүгэ, Маҥааска араас кэмнэргэ учууталынан үлэлээбитэ. Дуобаты бэйэтэ этэринэн “кытта кырдьар кыдьыгым — дуобатым”, өссө киэргэтэн “Пуобат” – диэччи.

         Боотулуу сэттэ, аҕыс кылаастаах оскуолатыгар, кэлин орто оскуолаҕа нуучча, саха тылларын уонна литературатын учууталынан өр сылларга үлэлээбитэ.

“Сардаҥа” литературнай куруһуогу салайбыта. Үөрэппит оҕолоруттан биллэр тыл үөрэхтээҕэ М.П. Алексеев-Дапсы, суруйааччылар В. Сивцев, Н. Герасимов-Айталын, журналистар А. Архипов, П. Ксенофонтов, В. Матахов, И. Федотов, И. Архипов, М. Матахова, Н. Короякин-Уран Ньукулай о.д.а үүнэн-сайдан тахсыбыттара, бары дуобатчыттар.

         Прокопий Степанович иллэҥ кэмигэр дуобаттыыра, дьону дьарыктыыра, үлэлээбит оскуолатын аайы үөрэнээччилэргэ дуобат секциятын аһан үлэлэтэрэ. Оройуоҥҥа үөрэх салаатын инспекторынан үлэлиир кэмигэр дуобат оонньуутун күүскэ сайыннарбыта, кини уонна Владимир Романович Тобохов көҕүлээһиннэринэн 1960-нус сыллартан дуобат оройуоннай күрэҕэ тэриллэн барбыта.

         Күрэхтэһиилэргэ үөлээннээхтэрэ, коллегалара бастакынан ылсыһан дуобат күрэхтэһиитигэр оонньообуттара. Төрөппүт оҕолоро Владимир, Еля, Татьяна аҕаларын дьарыктааһынынан улуус бастыҥ дуобатчыттара буолбуттара.